“ICT EXPO 2013” нээгдлээ

Мэдээлэл харилцаа холбооны салбарынхан өөрсдийн нэвтрүүлсэн дэвшилтэт технологи, хийсэн бүтээснээ олон нийтэд ил тодоор танилцуулж, оны шилдгүүдээ тодруулдаг “ICT EXPO 2013” үзэсгэлэн яг одоо “Мишээл экспо” төвд нээлтээ хийж байна. Нээлтийн арга хэмжээнд Ерөнхий сайд Н.Алтанхуяг, Нийслэлийн Засаг дарга Э.Бат᠎᠎᠎-Үүл, Нийслэлийн Засаг даргын тамгын газрын дарга Ё.Гэрэлчулуун, Харилцаа холбооны зохицуулах газрын дарга Н.Балгансүрэн болон бусад албаны хүмүүс оролцлоо.

7 дахь жилдээ зохион байгуулагдаж байгаа энэхүү үзэсгэлэн Монгол Улсад орчин цагийн харилцаа холбооны салбар үүсч хөгжсөний 92 жил, “Цахилгаан холбоо, мэдээлэлжсэн нийгмийн Дэлхийн өдөр”-ийн хүрээнд болж байгаагаараа онцлогтой юм. “ICT EXPO 2013” үзэсгэлэн энэ жил “Ирээдүйтэй холбогдоё-Шинэ амьдралын хэв маяг” гэсэн уриан дор зохиогдож байна.

Үзэсгэлэн энэ сарын 21-ыг хүртэл үргэлжлэх бөгөөд энэ хугацаанд мэдээлэл харилцаа холбооны салбарынхан өөрсдийн нэвтрүүлсэн дэвшилтэт технологи бүхий бүтээгдэхүүн, үйлчилгээнүүдийг олон нийтэд нээлттэй танилцуулах юм.