Цаатан иргэдэд тэтгэмж олгоно

Цаа буга маллан тайгад амьдарч буй цаатан иргэдийн амьдралыг дээшлүүлэх, тэдний боловсрол, нийгмийн хамгааллыг сайжруулах талаар шат дараалсан арга хэмжээ авч ажиллахыг Монгол Улсын Ерөнхийлөгч, Засгийн газарт үүрэгджээ. Тус зарлигийг хэрэгжүүлэхээр Засгийн газар тогтоол гаргаж, 2007 оноос хэрэгжүүлж эхэлсэн “Цаа бугын аж ахуйг сэргээх, цаачдын амьдралын түвшинг сайжруулах хөтөлбөр”-ийн хэрэгжилтийг эрчимжүүлэх төлөвлөгөө баталсан байна. Уг төлөвлөгөөний дагуу ирэх сарын 1-ээс эхлэн тайгад амьдардаг 18 хүртэлх насны цаатан хүүхдэд Хангайн бүсийн амьжиргааны доод түвшингийн 50 хувьтай тэнцэх хэмжээний, насанд хүрсэн иргэнд амьжиргааны доод түвшингээр сар бүр мөнгөн тэтгэмж олгохоор болжээ. Мөн алслагдсан нутагт амьдарч байгаа цаатан иргэдэд төрийн үйлчилгээг шуурхай хүргэх ажлыг зохион байгуулж ажиллах аж.