Өглөө бүр 500 хятад ажилчин улаанбаатарт ирж байна

Зам, барилгын улирал эхэллээ. Гэтэл ажилчдын олонхи нь гадныхан бай­даг. Ялангуяа БНХАУ-ын иргэд. Тиймээс манай улсад хөл тавьж байгаа хятад ажилчдыг сурвалж­ла­хаар өчигдөр өглөө төв вокзалыг зорилоо. Өмнөд хөршөөс өглөө бүр Замын-Үүд-Сайншанд-Чойр-Ба­гахангай-Улаанбаатар чиг­лэлийн 275 дугаар галт тэрэг 9.30 цагт ирдэг ч олонхи нь наймаа эрхлэгч монголчууд. Харин түүний араас 10.30 цагт Эрээн-Улаанбаатар чиглэлийн нэмэлт вагонд хятадууд ирдэг байна. Энэ үеэр хятад, монгол хүмүүс хоёр гурваараа энд тэнд зогсон хоорондоо ярилцана. Хя­та­дуудыг угтан авахаар зогсч буй нь илт. Зарим нь нутаг нэгтнүүдээ хүргэ­хээр төмөр замын тэрэг­чид­тэй тохиролцоно.

Галт тэрэг ирж зогсох чимээ­нээр үйлчлэгчид хаалгаа нээв. Цүнх, чемодан барь­сан хятадууд бууж байгаа нь харахаас андашгүй юм. Вагон бүрээс 16, 22, 29, 27, 24 гэх мэт тооны хятад ажилчид бөөн бөөнөөрөө буув. Бүр вагон дүүрэн ч ирсэн байлаа. Тэд ногоон алаг хувцсаар жигдэрчээ. Тэднийг нэгэн залуухан бүсгүй их л сурамгай га­зарч­лав. Нэг дор ирсэн 35 хятад иргэдийн ачаа тээ­шийг портерт ачуулав. Араас нь хэд хэдэн жижиг тэрэг тэднийг зөөхөөр да­раа­лан зогсчээ. Олуулаа ирсэн “ажилчин зөгий­нүүд”-ийн талаар монгол хэлмэрчээс лавлавал “Ба­рил­гад ажиллахаар ирсэн хууль ёсны зөвшөөрөлтэй иргэд” хэмээн цааш мэ­дээ­лэл өгөхөөс эрс татгалзав.

Нэмэлт галт тэрэг 24 вагонтай, нэг бүр нь 36 суудалтай. Дунджаар бод­вол дор хаяж 500 орчим хятад ажилчин өглөө бүр манай улсын нутаг дэвс­гэрт хөл тавьдаг ажээ. Вагоны үйлчлэгчдээс лав­ла­вал тэд өдөр бүр ирдэг гэнэ. Ялангуяа өнгөрсөн сарын сүүлчээс манай улсыг зорих нь эрс нэ­мэгд­сэнийг төмөр замын ажилчид хэлж байлаа. Хуу­лийн дагуу манай ул­сын хүн амын гурван хувь нь гадаад иргэн байх ёстой. Нарийвчилбал нэг улсын иргэдийн тоо нэг хувиас хэтрэхгүй гэжээ. Тэгвэл өнгөрсөн сараас эхэлсэн хятадуудын цуваа нэг биш нэлээд хувийг эзэлсэн байна.

Б.ЗАЯА

ЗУУНЫ МЭДЭЭ