Б.Чойжилсүрэн, Ч.Хүрэлбаатар нарын туслахуудын хууль бус үйлдлийг илчилсэн сонгогчид мөнгөн урамшуулал авна

Монгол Улсын Сонгуулийн Ерөнхий Хороо өнгөрсөн ням гарагт хуралдаж Увс аймгийн Тариалан сумын иргэн Х.Баярсайхан, З.Мөнхнасан, Ч.Бат-эрдэнэ, М.Шинэн, Ч.Сосорбарам, Ж.Далай, М.Хүүхээ, Ж.Жавзан, Б.Долгор, М.Нүүдэл, Н.Бурмаа, М.Отгонхүү, М.Шижгэрбат нарт Улсын Их Хурлын сонгуулийн тухай хуулийн 35 дугаар зүйлийн 35.29-д заасны дагуу тухайн сонгогчид тараасан мөнгөн дүнг арав дахин нэмэгдүүлсэнтэй тэнцэх хэмжээний мөнгөн урамшуулал болох 13 сая төгрөгийг олгож, түүнийг гэм буруутай этгээдээр нөхөн төлүүлэхээр шийдвэрлэв.
Эдгээр иргэд нь УИХ-ын гишүүн Б.Чойжилсүрэн, Ч.Хүрэлбаатарын туслахууд иргэдэд их хэмжээний мөнгө тарааж, сонгогчдын саналыг худалдан авах үйлдэл хийж байсныг баримтжуулан, СЕХ-нд мэдэгдсэн юм.