Таны газар 400 м2 талбайтай бол 1 өрөө, 700 м2 хүртэл бол 2 өрөө байраар солих боломжтой

VII хорооллын газрыг чөлөөлөхтэй холбоотойгоор иргэдээс ирүүлдэг түгээмэл асуултад хариулж байна. Мэдээллийг Нийслэлийн барилга, хот байгуулалт, төлөвлөлтийн газраас авав.

-Шинээр баригдах VII хорооллоос байр авах хүсэлтэй иргэд хаана хандах вэ?
-Уг барилгыг барьж байгаа Орон сууцны санхүүжилтийн корпорац, “Бэрэн констракшн”, “Анд интернэшнл” компанид хандаж болно. VII хорооллын эхний ээлж болох 50 га газрыг орон сууцжуулахаар төлөвлөсөн газарт одоогоор 2503 айл суурьшиж байгаа. Зөвхөн 50 га-д барилга барихад долоон мянган айл орон сууцтай болно.

-Айлуудын газрыг хэрхэн үнэлж авах вэ?
-Тухайн газрыг өмчлөгч, эзэмшигчид барилгын компаниудтай харилцан тохиролцоно. Орон сууцны санхүүжилтийн корпорацын иргэдтэй тохиролцож газар чөлөөлж байгаагаас үзвэл 400м2 талбайтай бол 1 өрөө байр, 700м2 хүртэл бол 2 өрөө байр гэх мэтээр тохиролцож байгаа юм билээ. Солонгос, Япон зэрэг хөгжилтэй орны туршлагаас харахад газар чөлөөлөх айл өрхийн 70 хувь нь зөвшөөрсөн тохиолдолд дахин барилгажуулах нөхцөл бүрдлээ гэж үздэг.

-VII хороололд барих орон сууцны барилгын компаниудын нэр тодорхой болсон уу?
-Одоогоор Орон сууцны санхүүжилтийн корпорац, “Анд интернэшнл”. “Чин удам” компаниуд иргэдтэй зөвшилцөж гэрээ байгуулах замаар газар чөлөөлж байгаа. Цаашид Ерөнхий төлөвлөгөөний дагуу эскиз зургаа сайн боловсруулсан газар эзэмшигч, өмчлөгч хувь хүн барилга барих асуудал нээлтэй. Заавал тийм компани байх ёстой гэсэн хатуу шаардлага байхгүй.

-Барилгажилтын ажил хэзээ дуусах вэ?
-VII хорооллыг барилгажуулах төслөөр 2020 он хүртэл энэ ажил үргэлжилнэ. Уг хороололд 10956 айлын орон сууцнаас гадна шинээр 920 хүүхдийн сургууль, 300 хүүхдийн цэцэрлэг, 50 гаруй үйлчилгээ, олон нийтийн барилга байгууламж, 28 га-д ногоон байгууламж, соёл спортын цогцолбор хороолол баригдах юм.

-Нэг хашаанд олон айл амьдарч байгаа. Жишээ нь хүүгийнх нь, аавынх нь гэх мэт. Ийм тохиолдолд яах вэ?
-Тухайн хашаанд амьдарч байгаа өрхийн тоогоор бус хашааны өмчлөгч эзэмшигчтэй зөвшилцөн гэрээ хийх, эсвэл худалдан авах гэх зэрэг арга замаар энэ ажил явагдана.

Ч.Туяа