Эрүүл төрсөн нярай эмнэлгийн орон дээр амиа алдлаа

Эрүүл саруул төрсөн нярай ээжийнхээ хөхөнд даруулж нас барсан эмгэнэлт мэдээ сэтгэл сэрдхийлгэнэ. Өнгөрсөн ням гаригийн үүрийн 06:00 цагийн үед Хоёрдугаар амаржих газарт ийм явдал болжээ. Эл харамсалтай хэрэг тус эмнэлэгт орны хүрэлцээ муутайгаас болж гарсан байна. Сонгинохайрхан дүүрэгт харьяалалтай эхчүүд ирж амарждаг тус  эмнэлгийн төрсний дараах тасагт ердөө 14 ор байдаг аж. Тус тасаг ачааллаа даахгүйн улмаас  нэг орон дээр хоёр эхийг нярайтай нь хамт хэвтүүлж байсан аж. Өөрөөр хэлбэл нэг орон дээр хоёр эх, хоёр хүүхэд гээд нийтдээ дөрвөн хүн хэвтэж байгаа юм. Ийнхүү шахцалдан унтаж байсан эхийн нярай хөхөндөө дарагдаж нас барсан байна.

Бүсгүй 27 настай, сая төрсөн нярай нь түүний дөрөв дэх хүүхэд байжээ. Урьд өдөр /өнгөрсөн бямба гариг/-ийнх нь оройхон амаржсан эх үүрээр хүүхдээ хөхүүлж байгаад хэсэг зуур унтчихсан байна. Хүүхэд нь амьсгал хураасныг мэдээд цочирдож, балмагдсан ээж сувилагчид ханджээ.

Тухайн өдөр төрсний дараах тасгийн гурван ч орон дээр эх, хүүхэд нийлсэн тус бүр дөрвөн хүн хэвтэж байсныг эх сурвалж хэлж байгаа юм. Цагдаа нар хэргийн газарт үзлэг хийж, гэрэл зургаар баримтжуулсны эцэст хавтаст хэрэг үүсгэсэн байна. Гэсэн ч энэ хэрэгт эзэн холбогдогч, эсвэл буруутан олдохгүй болов уу. “Шаварт унасан шарын эзэн” гэдэг шиг үрийнхээ хойноос гашуудсан залуухан ээж л өөрийгөө буруутган шаналж суугаа. Үнэндээ бяцхан нярайн амийг хэнээс нэхэх ёстой вэ?

Болсон явдлын талаар тодруулахаар тус эмнэл­гийн дарга Б.Оюунхандтай уулзахад, “Наадахаа цаг­даагаас асуу. Энэ хэрэгт хүүхдийн ээж буруутай” гээд халгаасангүй. Эмнэл­гийн ажилтнуудыг, эсвэл өөрийг нь буруутгах вий гэж эмээхдээ тэрээр энэ хариултдаа өөрөө ч гэсэн итгэхийг хүсч байгаа биз.

“Нэг орон дээр эх хүүхэд нийлсэн дөрвөн хүн шахцалдаж унтсанаас болж ийм явдал болсон юм биш үү” гэсэн асуулта,  “Үгүй. Наад хэргээ цаг­даагаас асуу гэж байна шүү” гэж уурслаа. Эцсийн эцэст энэ хэрэгт хэн буруутан байх нь сонин биш юм. Гагцхүү дахиад ийм явдал давтагдахгүй гэх баталгаа байхгүй бай­гаа нь л айдас төрүүлж байна.

Өмнө нь гурван хүүхэд төрүүлж байсан ээжид туршлага юу л дутаа аж. Ганц орон дээр дөнгөж төрсөн нялх биетэй хоёр эмэгтэй, хүүхдүүдийнхээ хамт чихцэлдэж, хүссэ­нээ­рээ хөдөлж чадахгүй хөшиж  хэвтсээр ядраа байлгүй. Эцэст нь хэ­сэгхэн зуур дуг хийсэн нь энхрий үрийн энэ хорвоод амьдрах цаг хугацааг төгсгөл болгож орхилоо.

Клиникийн Хоёрду­гаар амаржих газрын нэг эх баригч, сувилагчид өдөрт 40-50 хүн /үйлчлүүлэгч/ оногддог гэж байгаа. Өөрөөр хэлбэл, энэ эмнэлгийн эмч ажилтнууд болон орны тоо нь ачааллаасаа хэд дахин бага. Ерөөс манай эмнэлгүүдийн нийтлэг дүр зураг энэ юм. Шинээр төрөх эмнэлэг байгуулъя гэж өчнөөн жил ярилаа. Эцэст нь Нэгдүгээр амар­жих газарт өргөтгөл барих болсон.

Гэхдээ тэрэнд нь улсын төсвөөс нэг ч төгрөг хаясангүй. Уул уурхайн үйл ажил­лагаа явуулдаг компани нийгмийн ха­риуц­лагаа ухамсарласны хүчинд нэгдүгээр амар­жих газрын ор 150-иар нэмэгдэж, тэрбум гаруй төгрөгийн тоног тө­хөө­рөмж шинээр суурилууна гэж байгаа. Гэсэн ч энэ нийслэлд хан­галтгүй бай­гааг өнгөрсөн ням гаригт болсон эмгэнэлт явдал харууллаа. Төсвийн мөн­гөө эх хүүхдэд зориу­ла­хаас харамлаад байдаг юм бол өч төчнөөнөөрөө үйл ажиллагаа явуулж байгаа уул уурхайн компаниудыг “дарамтлаад” ч болтугай эмнэлэг бариулаад байх хугацаа даанч их байлаа. Өөрсөддөө болохоор на­мын байр нэрээр ордон сүндэрлүүлж, пар­ла­мен­тын ордон босгохоор Ку­вейтүүдээс тусламж хүсч хөрөнгөө шийдүүлчихэж дөнгөдөг эрхэм төр баригчдад хүүхдийн амь  үнэхээр сонин биш ажээ.

Зууны мэдээ