“I Phone 5” жинхэнэ тэсрэлт байх нь

Гар утас зохион бүтээгч компаниуд “галзуурах” нь ээ. Уржигдар шөнө Сан Фран­циско хотноо “Apple” компани “I Phone 5″ гар утсаа танил­цууллаа. Урьдын л адил хэ­рэг­лэгчдийн дунд хүлээлт үүсгэчихээд байсан бүтээг­дэхүүнийг танилцуулахаас өмнө өмнөх загваруудыг нь бодвол тийм ч олон таамаг­лал дэвшүүлээгүй байсан юм. Ерөнхийдөө шилэн га­даргуутай болох нь гэсэн мэдээлэл байсан ч бусад үзүүлэлтийнх нь талаар мэ­дээлэл хомс байсан билээ. Харин дэлхий даяар дэгдээд байсан таамаглал, цуу яриаг өчигдөр нэр мөр болгож шинэ бүтээгдэхүүн олны өмнө гар­лаа. Ингээд тус бүтээгдэхүүн ямар “ид шидтэй” болохыг сонирхуулъя.

Хамгийн эхний үзүүлэлт бол гадаад үзэмж. Өмнөх хоёр загвар хоорондоо төс­тэй, гаднаас нь харахад ши­нэч­лэлт байхгүй мэт харагдаж байсан бол шинэ загвар нь “I Phone” хэрэглэгчдийг догд­луулж байна. Өргөнөөрөө хуучинтайгаа ижилхэн бо­ловч илүү өндөр болжээ. Мөн дэлгэцээ томсгож дөрвөн инч болгосон байна. Жингийн хувьд мэдээж хөнгөхөн бол­сон. “I Phone 4″ 140 грамм жинтэй байсан бол одоогийнх нь 112 грамм. Зузаан нь ч 9.3 мм-ээс 7.6 мм болтлоо ним­гэрчээ. Тэгэхээр сүүлийн үеийн гар утаснуудаас хам­гийн “ухаантай”, хамгийн ним­гэн, хамгийн хөнгөн нь болж байгаа юм. Харин өнгөний хувьд уламжлалт хар, цагаан нь хэвээрээ.

Төв процессор нь өмнө­хөө­сөө хоёр дахин хурдтай, А6 чиптэй. Шуурхай санах ой нь 512 мега байтаас нэг гега болж нэмэгджээ. Тогтмол са­нах ой нь харин урьдын адил 16, 32, 64 гега гэсэн сон­голттой. Камерын хувьд дэл­гэцийн хэмжээ томорсноос хамаараад 960х640 байснаа 1136х640 болж нэмэгдсэн бөгөөд нягтрал нь 326 мега юм байна. Үүнийхээ зэрэгцээ Full HD 1080p видео бичих, видео бичих завсраа фото зураг авах, 28М пиксел хүртэл хэмжээтэй панорама зураг авах зэрэг дэвшлүүдийг нэвт­рүүлжээ. Мөн нүүрэн талын камер нь 720p хүртэл HD чанартай болж сайжирчээ. Сүлжээний хувьд юун 3G, юун утасгүй интернэт. “Apple”-ийнхан 4G (LTE) сүлжээг нэвтрүүлсэн нь хам­гийн том дэвшил болоод бай­на. Ингэхээр мэдээж хэрэг интернэтийн хурд гэдгийг ёстой нэг мэдрүүлэх шиг бо­лох нь. Энэ олон дэвшилт зэрэг хийгдчихээд байхад ч батерей нь улам сайжирсан тухай мэдээлэл байна. Идэв­хигүй үедээ 225 цаг, дата ашиглахдаа найман цаг бол­жээ. Харин өмнөх загвар нь идэвхигүй үедээ 200 цаг бай­сан юм. Үүнийхээ зэрэгцээ цоо шинэ iOS 6 үйлдлийн системийг анх удаа суул­гасан гэнэ. Тэгэхээр бид шинэ утастайгаа танилцах гэж, шинэ утсаа ашиглах гэж бага­гүй хугацааг сонирхолтой­гоор өнгөрөөх нь ээ.

USB холбогч кабел нь жиж­гэрсэн шинэ загвартай болж түүнийгээ “Lightning” гэж нэрлээд байгаа. Гэхдээ хуу­чин кабелаа ч мөн ашиглаж болох хувиргагчтай байх юм байна.

Мэдээж хэрэглэгчдийн хамгийн их сонирхож байгаа зүйл бол үнэ. “Apple”-ийнхан зах зээлийн жишгээр 4S-ийн үнийг буулгаад шинэ бүтээг­дэхүүнээ одоогийн утасны үнээр худалдаалахаар бол­жээ. Тэгэхээр та бид АНУ-аас шинэ “I Phone” захилаа гэхэд 650 ам.доллартай байх шаард­лагатай боллоо. Ха­рин захиалгаа өнөөдрөөс авч эхэлж байгаа ажээ. Эх­ний ээлжинд АНУ, Канад, Англи, Франц, Герман, Авст­рали, Япон, Хонгконг, Синга­пурт энэ сарын 21-нээс эхэлж худалдаална гэсэн. Тэгэхээр та бид уг гайхалтай бүтээг­дэхүүнийг ирэх долоо хоно­гоос эхлэн ашиглах боломж­той болох баяртай мэдээ байна.

С.АЛТАНЦЭЦЭГ