“Лондон-2012”-ын нээлт 04.00 цагт эхэлнэ

“Ядуусын хорооллын саятан” кинонд найруулагчаар ажиллаж, Оскар гардсан найруулагч Дэнни Бойл олимпийн наадмын нээлтийн ёслолыг хүлээн суугаа дэлхийн сая сая үзэгчдэд чухам ямар бэлэг барихаар зэхсэн нь маргааш үдэш дэлхий нийтэд ил болно.

27 сая фунт стерлингийн төсөвтэй батлагдсан “Лондон-2012” зуны XXX олимпийн наадмын нээлтийн ёслол орон нутгийн цагаар баасан гаригийн үдэш 21.00 цагт эхлэх юм. Энэ нь Монголын цагаар бямба гаригийн өглөөний 04.00 цагт тохиож байна.

“Гайхамшгийн арал” хэмээн нэрлээд буй олимпийн нээлтийн ёслол зохион байгуулагч орныг илтгэх чухал арга хэмжээ. Мөн олимпод оролцох 200 гаруй баг тамирчдын жагсаал, олимпийн туршид бадамлах галт бамбарыг асаах торгон мөчийг дэлхий нийт хүлээж байна.

Олимпийн хугацаанд “дэлхийн нүд” зөвхөн Лондон руу чиглэх нь гарцаагүй.