МИК-д худалдсан болон худалдахаар хүлээгдэж байгаа орон сууцны ипотекийн зээлийн мэдээллийг иргэд өөрсдөө шалгах боломжтой боллоо

“Монголын Ипотекийн Корпораци ОССК” ХХК (МИК) нь Монгол Улсын Засгийн газар болон Монголбанкнаас хамтран хэрэгжүүлж буй “Орон сууцны хөнгөлөлттэй хүүтэй зээлийн хөтөлбөр”-ийн хүрээнд олгосон зээлийг Банкнаас худалдан авч, Ипотекийн зээлээр баталгаажсан бонд (ИЗББ) гаргах үйл ажиллагаа явуулдаг. Өөрөөр хэлбэл дараагийн иргэнд орон сууцны зээл олгох эх үүсвэрийг бүрдүүлдэг.

МИК-д худалдсан болон худалдахаар хүлээгдэж байгаа талаарх мэдээллийг иргэд www.mik.mn сайт хандаж “Иргэд олон нийт” цэсний “Ипотекийн зээлийн мэдээлэл авах” хэсгээс “ДАН” танилт нэвтрэлтийн нэгдсэн системээр дамжуулан дараах 3 төрлийн мэдээллийг авах боломжтой боллоо.

• МИК-д шилжсэн эсэх. Тухайн орон сууцны зээлийг Банкнаас МИК-д худалдсан эсэх мэдээллийг энэ хэсгээс харах боломжтой.
• Хүсэлтийн явц. Зээлдэгч нь МИК-д худалдсан зээлийн барьцаа хөрөнгө, зээлдэгч, төлбөрийн хуваарь гэх мэт өөрчлөлт оруулах хүсэлт гаргасан тохиолдолд хүсэлтийн явцыг энэ хэсгээс харах боломжтой.
• Барьцаа хөрөнгө чөлөөлөх хүсэлтийн явц. Орон сууцны зээлээс хэсэгчлэн болон бүрэн төлөлт хийж урьдчилгаа төлбөрт барьцаалсан барьцаа болон үндсэн барьцаа хөрөнгөө чөлөөлүүлэх тохиолдолд явцын мэдээллийг энэ хэсгээс харах боломжтой.

МИК нь олон улсын мэдээлэл аюулгүй байдлын “ISO/IEC 27001:2013” стандартыг хэрэгжүүлэгч байгууллага тул хувь хүний мэдээллийн нууцлалыг хамгаалж, “ДАН” танилт нэвтрэлтийн нэгдсэн системээр дамжуулан дээрх мэдээллийг зөвхөн тухайн зээлдэгчдэд өгч  байна.