Б.Мөнхзаяа Шанхай хотноо болсон олон улсын марафонд дөрөвдүгээр байр эзэлжээ

Монгол Улсын Үндэсний шигшээ багийн тамирчин, Зэвсэгт хүчний 327 дугаар ангийн алба хаагч, ОУХМ, дэслэгч Б.Мөнхзаяа БНХАУ-ын Шанхай хотноо зохион байгуулсан олон улсын марафоны 10 километрийн зайд 33.31 цагийн амжилтаар дөрөвдүгээр байрт шалгарчээ.

Б.Мөнхзаяа “Этиоп, Марокко зэрэг марафон гүйлтээр тэргүүлэгч 10 гаруй орны шилдэг 100 гаруй тамирчинтай өрсөлдөж, тусгай байрт шалгарлаа. Шулуун замын 10 километрийн зайд Монгол Улсын эмэгтэй тамирчдаас анхлан оролцсон учраас рекорд амжилт тогтоолоо. Монгол Улсаас ганцаараа оролцсон” гэлээ.

Тэрээр ирэх арванхоёрдугаар сард мөн БНХАУ-ын Шанхай хотноо болох олон улсын тэмцээн оролцох юм байна.

ОУХМ, дэслэгч Б.Мөнхзаяа сарын өмнө БНХАУ-ын Хөх хотод болсон олон улсын марафон гүйлтийн тэмцээнд түрүүлсэн юм.