Төрийн холбоог гадныхны мэдэлд өгчээ
Төрийн холбооны суурин утасны үйлчилгээг “Монголын цахилгаан холбоо” ХК-д шилжүүлж байгаа нь төр нууцаа гадныхны мэдэлд өгч байгаагаас өөрцгүй хэрэг болж байна.
Бид өмнөх дугаартаа Төрийн холбооны газрын бүтэц, зохион байгуулалтад өөрчлөлт хийж, Кибер аюулгүй байдлын газар нэртэй болгон өөрчилсөн тухай нийтэлсэн. Өөрөөр хэлбэл Засгийн газрын өнгөрсөн оны 11 дүгээр сарын есний өдрийн хуралдаанаар энэхүү асуудлыг баталсан байна.
Ингэхдээ “Төрийн байгууллагуудыг кибер халдлагаас хамгаалах тогтолцоог бүрдүүлэх зорилгоор Төрийн холбооны газрыг Кибер аюулгүй байдлын газар болгон өөрчлөн зохион байгуулж, үүнтэй холбогдуулан Төрийн ордны холбоо, техникийн үйлчилгээг үндсэн хөрөнгө, орон тоо, төсвийн хамт Төрийн тусгай хамгаалалтын газарт шилжүүлэх, “Үндэсний дата төв”-ийг төрийн тусгай хамгаалалтад авах зэрэг арга хэмжээ авч хэрэгжүүлэхийг Тагнуулын Ерөнхий газрын дарга Р.Болдод, энэхүү үйл ажиллагаанд мэргэжил, арга зүй, техник, программ хангамжийн чиглэлээр туслалцаа үзүүлж, хамтран ажиллахыг Мэдээлэл, шуудан, харилцаа холбоо, технологийн газрын дарга Ж.Бат-Эрдэнэ, Харилцаа холбооны зохицуулах хороо (Б.Болдбаатар)-нд тус тус даалгасугай” гэжээ.
Мөн “Ашиглалтын хугацаа дууссантай холбогдуулан төрийн холбооны утасгүй телефон системийг /9200… бүхий дугаарлалттай үүрэн холбоо/ хэрэглээнээс хасч, суурин утасны үйлчилгээг холбогдох төхөөрөмж, зээлийн хамт “Монголын цахилгаан холбоо” ХК-д шилжүүлэх асуудлыг холбогдох хууль тогтоомжийн дагуу судалж, шийдвэрлэхийг Сангийн сайд С.Баярцогт, Тагнуулын Ерөнхий газрын дарга Р.Болд, Төрийн өмчийн хороо (Д.Сугар)-нд тус тус даалгасугай” гэсэн байгаа юм.
Ийнхүү төрийн байгууллагуудын ашиглаж байсан суурин утасны үйлчилгээг Солонгос, Монголын хамтарсан “Монголын цахилгаан холбоо” ХК-д шилжүүлэн өглөө.
Тус компанийн 54.67 хувийг төр эзэмшиж, үлдсэн хувийг нь Солонгосын “Кореа телеком” компани эзэмшдэг болсоор багагүй хугацаа өнгөрсөн.
Ингэж гадны хөрөнгө оруулалттай, хувь нийлүүлсэн компанид төрийн байгууллагуудын холбоог шилжүүлж байгаа нь кибер халдлагаас хамгаалж буй хэлбэр болж байна уу, тэгээд.
“Монголын цахилгаан холбоо” ХК өнгөрсөн хугацаанд БНХАУ-ын “ZTE” корпораци болон “Нuawei” компанийн мэдээллийн техник технологи, программ хангамжийг бүрэн хэмжээгээр ашигласаар ирсэн байдаг. Тэгвэл тухайн компаниудыг олон улсын хэмжээнд мэдээллийн техник технологи, программ хангамжийн худалдаа үйлчилгээний бизнес эрхлэхээс гадна төрийн болон бусад субъектын захиалгаар тагнах, яриа чагнах чиглэлээр өндөр мэргэшсэн гэж үздэг ажээ.
Тухайлбал, Англи, Австрали, Энэтхэг улсын үндэсний мэдээлэл, харилцаа, холбооны сүлжээнд суурилуулсан төхөөрөмжүүд нь мэдээллийн аюулгүй байдалд заналхийлэл учруулж байгаа талаар тус улсуудын Тагнуулын алба мэдэгдэж байсан тухай хэвлэлүүдээр шуугиж байсныг санаж байна. Тэгэхээр төрийн харилцаа холбооны салбар аюулгүй байдлын хувьд хэр найдвартай гарт очиж байгаа нь илэрхий юм биш үү.
Үндсэндээ кибер аюулгүй байдал гэдэг сүржин нэрийн цаана “Монголын цахилгаан холбоо” ХК-ийн данс руу урсах мөнгө, хөрөнгийн хэмжээ л чухал байгаа болов уу. Өөрөөр хэлбэл энэ онд хувьчлагдах ёстой тус компанийн ашгийг өсгөхийн тулд төрийн байгууллагуудын хэрэглэсэн харилцаа холбооны төлбөрийг татаж буй хэлбэр юм. Сүүлийн жилүүдэд үүрэн телефоны операторуудын үйл ажиллагаа өргөжиж, суурин утасны хэрэглээ буурсаар байгаа.
Тиймээс “Монголын цахилгаан холбоо” ХК алдагдалтай ажиллах болсон. Үүнийгээ ч хүлээн зөвшөөрч, өнгөрсөн оны сүүлээр ажилчдаа хэдэн зуугаар нь цомхотгох тухай яригдаж байсан. Тэгэхээр тус компанийг хувьчлах хугацаа ойртсон учраас ашигтай ажиллах боломжит бүх арга, эрхийг хамтарсан компани байгаа үед нь шилжүүлэхээр шийдсэн нь энэ бололтой.
ugluuniisonin
URL:
