Нефтийн үнэ өсжээ
НЬЮ-ЙОРК. /Reuters/. БНХАУ-ын Шанхай хотод хөл хориог сулруулж, Нефть экспортлогч орнуудын байгууллага /ОПЕК/ Оросын нийлүүлэлттэй холбоотой эрсдэлийн талаар анхааруулсантай холбоотойгоор нефтийн үнэ мягмар гарагт өсжээ.
Тодруулбал, “Brent” маркийн нефтийн нэг торхын үнэ 6.16 ам.доллар буюу 6.3 хувиар өсөж, 104.64 ам.долларт хүрсэн бол “WTI” маркийн нефтийн үнэ 6.31 ам.доллароор /6.7 хувь/ өссөнөөр 100.60 ам.долларт хүрсэн байна. Даваа гарагт хоёр маркийн нефтийн аль аль нь 4 хувиар буураад байсан юм.
Шанхай хотод 14 хоногийн турш халдварын шинэ тохиолдол илрээгүй газруудыг эрсдэл бага бүсэд оруулан ангилсан бөгөөд дүүргүүд холбогдох мэдээллийг танилцуулжээ. Үүнтэй зэрэгцэн Оросын эсрэг хориг арга хэмжээ авсан тохиолдолд өдөрт нийлүүлдэг долоон сая торх нефтийг нь нөхөх боломжгүй гэдгийг ОПЕК анхааруулсан байна.
Мөн Оросын нефть, хийн өдрийн олборлолт даваа гарагт 10 сая торхоос доошилж буурсан нь 2020 оны долоодугаар сараас хойших хамгийн сул үзүүлэлт болсон талаар уг мэдээлэлд ойр эх сурвалжууд мягмар гарагт мэдээлжээ. Тэдний хэлснээр, Оросын нефтийн бүтээгдэхүүний дундаж гарц гуравдугаар сард 11.01 сая торх байсан бол дөрөвдүгээр сарын 1-11-нд 10.32 сая болж буурсан байна.
Европын Холбоо Оросын нефтид хараахан хориг тавиагүй байгаа ч энэ талаар хэлэлцэж эхэлсэн талаар зарим орны Гадаад хэргийн сайд нар мэдээлээд байгаа юм. “OANDA” корпорацийн зах зээлийн ахлах шинжээч Эдвард Мойягийн ярьснаар, Оросын эрчим хүч хоригт өртвөл нефтийн зах зээл томоохон цочролд эмзэг хэвээр байна.
ОПЕК мягмар гарагт Оросын нефтийн олборлолтын 2022 оны хэтийн төлөвийн урьдчилсан таамаглалаа өдөрт 530 мянган торхоор бууруулснаас гадна Украины нөхцөл байдлаас үүдэлтэй нөлөө, нефтийн үнэ өсөж байгаа, Хятадад өвчлөл нэмэгдэж байгааг харгалзан дэлхийн нефтийн эрэлтийн таамаглалаа мөн бууруулжээ.
Э.Хулан
Эх сурвалж: “Монцамэ” агентлаг
URL:
