Орон сууц, нийтийн аж ахуйн салбарын удирдах ажилтны УУЛЗАЛТ, СЕМИНАР амжилттай боллоо

Барилга, хот байгуулалтын яам, Барилгын хөгжлийн төв, Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлөөс хамтран Орон сууц, нийтийн аж ахуйн салбарын удирдах ажилтнуудын уулзалт, семнарыг Төв аймгийн Зуунмод суманд зохион байгууллаа.

Тус зөвлөгөөнд Барилга, хот байгуулалтын сайд Б.Мөнхбаатар, дэд сайд Э.Золбоо, Төрийн нарийн бичгийн дарга С.Магнайсүрэн, Барилгын хөгжлийн төвийн захирал Ц.Амарсанаа болон яамны газрын дарга нар тэргүүтэй албаныхан, 16 аймгийн 120 гаруй  удирдах ажилтан оролцож, салбарын бодлогын хүрээнд санал бодлыг нь сонсох цаашдын зорилго чиглэлээ тодорхойлон оролцлоо. Улаанбаатар хот болон 14 аймгийн төв орчин үеийн технологи бүхий дэвшилтэт цэвэрлэх байгууламжтай болно.

Улаанбаатар хот болон 14 аймгийн төв орчин үеийн технологи бүхий дэвшилтэт цэвэрлэх байгууламжтай болно

Барилга хот байгуулалтын сайд Б.Мөнхбаатар хэлсэн үгэндээ ”Нийтийн аж ахуйн салбарынхнаа дэмжиж, уялдаа холбоотой ажиллахаа илэрхийлж, энэ удаагийн уулзалтаар орон сууц, нийтийн аж ахуйн салбарын өмнө тулгамдаж байгаа асуудлуудыг нээлттэй хэлэлцэж, ирэх дөрвөн жилийн хугацаанд хийж хэрэгжүүлэх ажлуудаа төлөвлөх нь чухал. Барилгын салбарт БНХАУ -ын хөнгөлттэй 249,6 ам.долларын зээлээр 250,000м3/хоног хүчин чадалтай цэвэрлэх байгууламжийн барилга угсралтын ажил хийгдэж байна. Мөн АНУ -ын Мянганы сорилтын сангийн 350 сая ам.долларын буцалтгүй тусламжаар Улаанбаатар хотын ус хангамжийн 140.000 м3 /хоног хүчин чадалтай баруун эх үүсвэрийн барилга байгууламж, шугам сүлжээ, мөн цэвэрлэх байгууламжийн цэвэрлэсэн усыг дахин боловсруулах технологийн зориулалтаар ашиглах 50.000м3 хоног хүчин чадалтай үйлдвэр шугам сүлжээг барьж байгуулах ажлын бэлтгэл хийгдэж байна.

Азийн хөгжлийн банкны санхүүжилтээр Булган, Дархан Уул, Дорноговь, Өмнөговь, Дундговь, Сүхбаатар, Хөвсгөл, Хэнтий аймгийн төв Өвөрхангай аймгийн Хужирт сумын цэвэрлэх байгууламжийн барилга угсралтын ажил гэх мэт томоохон ажлуудыг гүйцэтгэж байна. Эдгээр төслүүд хэрэгжсэнээр Монгол Улсын нийслэл болон 14 аймгийн төв орчин үеийн технологи бүхий дэвшилтэт цэвэрлэх байгууламжтай болж байгаа” хэмээн онцлов.

Сумын төвийг орон сууцжуулах боломж бүрдэнэ

Энэ үеэр нийтийн аж ахуйн салбар нь хүний үндсэн эрх болох баталгаат ундны ус, ариун цэврийн байгууламжаар хангагдах эрхийг хангах хүрээнд төр засгаас онцгойлон анхаарч жил бүр нэлээдгүй хөрөнгө оруулалтыг улсын төсвөөс санхүүжүүлж ирсэн. БХБСайдын багцад 2016-2019 онуудад нийт 326,1 тэрбум төгрөг батлагдсанаас 159,0 тэрбум төгрөгийг нийтийн аж ахуйн салбарт хөрөнгө оруулалт болгон оруулсан байна. Гэсэн ч бодлогын хэмжээнд авч хэрэгжүүлэх асуудлууд байгааг удирдах ажилтнууд онцолж байлаа. Түүнчлэн нийтийн аж ахуйн салбарынхны нийгмийн амьжиргаа, цалин хөлсний асуудлууд ч хөндөх сэдэв байсаар удаж байгаагаа ч дурьдлаа. Салбарынхны хувьд болж байгаагаа дурьдаж болохгүйгээ хэлэлцэж ирэх онуудад хийх ажлуудаа төлөвлөх хурал боллоо хэмээн онцолсон юм.

Энэ онд нийт 10 аймагт шинээр цэвэрлэх байгууламж барихаар төлөвлөж байгаа нь сумын төвийг орон сууцжуулах боломж бүрдэнэ гэж үзэж буй. Тиймээс цаашид цэвэрлэх байгууламжинд ажиллах мэргэжлийн боловсон хүчин бэлдэх нь чухал гэдгийг албаныхан онцолж байлаа.