Ц.Нямдорж: Ерөнхий прокурорын орлогч байсан Г.Эрдэнэбат шоронд суух ёстой

Хууль зүйн байнгын хорооны хуралдааны үеэр С.Зоригийн хэргийг шалгах түр хороо байгуулах тухай асуудлаар УИХ-ын гишүүн, ХЗДХ-ийн сайд Ц.Нямдорж мэдээлэл хийлээ. Тэрээр мэдээллийн үеэр, “С.Зоригийн хэргийг шалгах түр хорооны бүрэлдэхүүнд олон гишүүн хэрэггүй. Өчигдөр орой Ерөнхий прокурорын орлогч байсан Г.Эрдэнэбат гэдэг хүн ярилцлага өгч байна билээ. Тэр хүн эрүүдэн шүүсэн асуудлаар шоронд суух ёстой хүн. Монголд шударга ёс гэж байна уу үгүй гэдгийг л би үзэх гээд байна.

Тэр этгээд гүйцэтгэх ажлын төлөвлөгөө гэдэг юманд гарын үсэг зурсан. Гүйцэтгэх ажлын төлөвлөгөөг тагнуулын нууц ажилтнууд зохиодог. Хоёр нууц ажилтан, мөрдөн байцаагч доор нь гарын үсэг зураад дээр нь Б.Хурц, Г.Эрдэнэбат, Б.Хурцын орлогч гурав гарын үсэг зурсан. Ингэж байж хүн тамладаг ажиллагаа хийгдсэн. Хэзээ ч прокурор гүйцэтгэх ажлын төлөвлөгөө баталдаггүй. Хамгийн хориотой юм нь. Ийм учраас түр хороог хурдан байгуулаад асуудлыг шийдэх ёстой.

Сүүлийн үед Ц.Нямдорж сайд байсан хэр нь энэ асуудлыг эрт илрүүлэх нь яасан юм гэдэг дайралт их ирж байгаа. Би 2012 онд сайдын ажлаа өгсөн. Энэ зохиомол ажиллагаа 2013 оны наймдугаар сард эхэлсэн. Буцаж 2017 онд сайд болоход энэ хэрэг шүүхээр орчихсон байсан. Надад С.Зоригийн хэргийн төлөө явсаны төлөө таван хэрэг үүсгэсэн байгаа. Гүйцэтгэх ажил, шүүн таслах, мөрдөн байцаалтын ажилд хөндлөнгөөс оролцох гэж оролдсон гэсэн. Мөн ШШГЕГ болон цагдаагийн ажилтнууд дээр эрүүгийн хэрэг үүсгэж дарамталж байгаа. Үүнийг бүгдийг нь захиалгаар хийж байгаа” гэлээ.

Х.Онон

Zuv.mn