Байнгын хороо Ерөнхийлөгчийн саналыг хэлэлцэнэ

УИХ-ын хоёр байнгын хороо, нэг дэд хороо өнөөдөр хуралдахаар товлосон байна.

Тухайлбал, 09.00 цагт эхлэх Байгаль орчин, хүнс, хөдөө аж ахуйн байнгын хорооны хуралдаанаар Ерөнхийлөгч Х.Баттулгаас ирүүлсэн саналын дагуу Ерөнхий хяналтын сонсгол зохион байгуулах асуудлыг хэлэлцэх юм.

Харин 10.00 цагт Ёс зүйн дэд хороо хуралдаж, ЖДҮХС-гийн зээл, “60 тэрбумын хэрэг”-ийн талаар хэлэлцэнэ.

Үдээс хойш буюу 14.00 цагт Аюулгүй байдал, гадаад бодлогын байнгын хороо хуралдаж, Монгол, Беларусь хооронд байгуулсан гурван гэрээг соёрхон батлах асуудлыг хэлэлцэхээр төлөвлөсөн байна. Үүнд Иргэний болон аж ахуйн хэргийн талаар эрх зүйн туслалцаа харилцан үзүүлэх тухай, Гэмт этгээдийг шилжүүлэх тухай, Эрүүгийн хэргийн талаар эрх зүйн туслалцаа харилцан үзүүлэх тухай гэрээ багтжээ.