Тааруулж ууцгаая миний ард түмээн…

1. Нэг хундага татав. Цээж халаад л. Хоёр хундага татав. Эхнэр жижигхэн харагдаж байна. Давжаа биетэй эхнэртэй суучихсан ч юм шиг. Хадам ээж мээж зүгээр яшиг л байна.
Гурван хундага татав. Сумын төв бол жижигхээн. Чээжний жоохоон зайд өлхөн багтаж байна.
Нэмээд жаахан уулаа. Аймагт бол би баавар юм аа. Засаг дарга энэ тэр нь бол жаахан банди ч юм шиг.
Би согтож байх шиг байна. Ер нь тасрах нь ээ. Өрөөсөн нүдээ нээгээд бодож байна.
Хот орвол би сүйдлэх юм байна. Улаанбаатар дэд бүтэцтэйгээ, утаа тоос шороо, хүн амтайгаа сэтгэлд багтаж байна.
76 гишүүн бол шатрын хүү ч юм шиг. Эх орноо хөгжүүлэх шиг амархан юм алга. Ер нь босоод улс эх орны талаар ерөнхийлөнч эд нартай ярьмаарч юм шиг.
Эхнэрийн ам хөдлөөд ямар нэг юм хэлээстэй. Реппер Эминем шиг ямар нэгэн хоп хоп дуу дуулаад ч байх шиг.
Орондоо оров. Багтах шинж алга. Алаг хорвоо давчуу юмаа.
2. Бодоод байсан чинь архи шиг цэвэр юм алга. Эх орны хөрсөн дээр халиуран ургасан улаан буудайг аваад шахаж, шахаж цэвэр свээрт гаргаж авч байгаа юм.
Эх орны хөрсрүү хэдэн арван метр өрөмдөж, өрөмдөж ам хага ташсан хийтэн ус гаргаж авна. Түүнийгээ баахан давхар шүүлтүүрээр шүүж шүүж янзын болгож байгаа юм.
Ингээд эх орны свээрт ус хоёроо үйлдвэрийн нарийн аргаар бужигнуулж холиод жинхэнэ цэвэр юм гарч байгаан. Ямарч химийн будаггүй. Сахар, давс, хий ч байхгүй.
Савалгаа энэ тэртэй нь ярих юм байхгүй. Хуванцар сав , лааз маазанд бус цэвэр шилэнд савлана. Нэр мэр нь бол Чингис Мингис үнэн сүртэй. Яахав сэжиглэсэн хүнд талийгаачийн нэртэй л юм даа. Би ч тэрийг нээх тоодоггүй юм.
Архи бүх өвчинд сайн. Бүр сэтгэл санаа ч эмчилнэ. Яаж уусан ч таргалуулахгүй.
Гэтэл Кока Коланд юу байгаан. Газ , хиймийн будаг, хуванцар сав, архийг бодвол баталгаагүй бөглөө , найдваргүй ус.
Бүгд хор байгаа биз дээ. Гэж зүүдлэв.
3. Өглөө сэрэв. Цээж цог залгисан мэт халуу шатаад л… Оройны будаатай хуургаа сорчихсон бололтой тархины таазанд нэг юм наалдаастай. Хөнжлөө сөхөөд жаахаан зайгаар нь харав.
Эхнэр хутга шөвгө бариастай, түмпэн саваа хангинуулаастай. Шууд чиглээд ирлээ. Арай дүрчихгүй байгаа.
Бөөлжихөд дараад өгөх, бөөстөхөд алаад өгөх хүн юмсан. Шартахад бантан эмрээд, Шаналхад сэтгэл эмжээд өгөх хүн юмсан .
Өчигдөр дэлхийд багтахгүй байсан би өнөөдөр хөнжил дотроо сураг алга. Жижигхэн харагдаад байсан эхнэр үнэхээр биерхүү хүн юм.
Тааруулж ууцгаая миний ард түмээн…

via Шагж гэлээн