Д.Трамп Калифорни муж улсын нөхцөл байдалтай танилцлаа

АНУ-ын Ерөнхийлөгч Дональд Трамп ойн түймрийн гамшигт нэрвэгдээд байгаа Калифорни муж улсын нөхцөл байдалтай танилцлаа.

Тус муж улсад гал түймрийн улмаас наад зах нь 74 хүн амиа алдаад байгаагийн зэрэгцээ 1200 гаруй хүн сураггүй байгаа юм.

Д.Трамп Парадайз хотод очих үеэрээ, одоогийн нөхцөл байдлыг харахад үнэхээр гунигтай байна гэж мэдэгдээд, ойн аж ахуйн менежмент ядмаг байгаагийн улмаас ийм байдалд хүрсэн гэдгийг дахин дурджээ.

Мөн тэрбээр, “Бид одоогийн байгаа менежментийг шинэчлэх шаардлагагүй бөгөөд байгаль орчны асуудал хариуцсан хүмүүстэй ажиллах болно. Одоогийн нөхцөл байдлыг хүн бүр харж байгаа байх. Цаашид ийм байдалд хүрэхгүй гэж найдаж байна” хэмээн хэлжээ.

Харин цаг уурын шинжээчдийн үзэж байгаагаар, уг гал түймрийн гол шалтгаан нь цаг агаар, уур амьсгалын өөрчлөлт, иргэдийн шилжилт хөдөлгөөн ажээ.