“Korean air” компанийн захирлыг шалгаж байна

БНСУ-ын Прокурорын газраас Корэйн Эйр компанийн захирал Чо Янхог татвараас зугтсан болон хөрөнгө шамшигдуулсан хэргүүдэд холбогдуулан шалгаж байна. Чо нь үндэсний агаарын тээврийн Корэйн Эйр компанийг эзэмшдэг Ханжин группын захирал ажээ. Тэрээр өнгөрсөн долоо хоногийн Пүрэв гарагт Сөүл хотын Өмнөд дүүргийн прокурорын газарт байцаалт өгсөн бөгөөд энэ нь түүний 4 дэх удаагийн байцаалт юм.

Тэрээр Ханжин группийн охин компаниар хувийн байрныхаа харуул хамгаалалтын хөлсийг төлүүлсэн зэрэг үйлдлүүддээ шалгагдаж байгаа юм. Мөн энэ удаа прокурорууд түүнийг шинэ хууль бус үйлдлүүдэд сэжиглэж буй бөгөөд нэмэлт тодруулга авч байгаа ажээ. Прокурорууд Чог баривчлах саналаа шүүхэд гаргасан боловч шүүхээс татгалзсан байна.

Дээрх мөрдөн шалгах ажиллагаатай холбогдуулан түүний гэр бүл энэ оны эхээр олны шүүмжлэлд өртөөд байсан юм. Түүний эхнэр, хоёр охиныг компанийн ажилтнууд болон өөрсдийнх нь нөлөөнд байдаг хүмүүсийг үг хэлээр доромжилж, бие мах бодийн хохирол учруулсан хэрэгт холбогдуулан шалгасан ажээ.