Эмэгтэй хүнд хамгийн аюултай улсаар Энэтхэг тодорлоо

Thomson Reuters Foundation байгууллагын явуулсан судалгааны шинэ тайланд Энэтхэг улсыг эмэгтэй хүнд хамгийн аюултай улс гэж тодорхойлжээ.

Уг судалгааг явуулахдаа Европ, Ази, Африк, Америк, Номхон далайн бүс нутгийн 550 мэргэжилтнүүдээс санал авах аргыг ашигласан байна. Үнэлгээнд нөлөөлсөн хүчин зүйлүүдэд эмэгтэйчүүдийн эсрэг бэлгийн хүчирхийлэл, хүний наймаа, хөдөлмөрийн боолчлол, хүсээгүй гэрлэлт, сэкс боолчлол зэрэг үзэгдлүүд багтжээ.

Судалгаанд оролцогчид нь энэ чиглэлээр ажилладаг мэргэжлийн хүмүүс, эрдэмтэд, анагаах ухааны салбарынхан, төрийн бус байгууллагууд, улс төрчид, хууль хэрэгжүүлэгчид, нийгмийн ажилтнууд байсан гэнэ.

Энэтхэгийн засгийн газрын тоо баримтад дурдсанаар 2007-2016 оны хооронд эмэгтэйчүүдийн эсрэг гэмт хэрэг энэ оронд 83 хувиар өссөн бол өнөөдөр цаг тутамд дөрвөн эмэгтэй хүчиндүүлж байдаг ажээ.

Тус улсад ойр ойрхон олныг цочирдуулсан хүчингийн хэрэг гардаг. Тухайлбал энэ оны эхээр Хинду шүтлэгтэй найман эр бага насны муслим охиныг бүлэглэн хүчиндсэн хэрэг гарч байв. Өнгөрсөн дөрөвдүгээр сард Котвали Нагар хотод болсон хуримын үеэр долоон настай охиныг хүчиндэж, амийг нь бүрэлгэсэн хэрэг гарч байжээ.

Саяхан 16 настай охиныг гэрт нь хүчиндэж, амьдаар нь шатааж алсан хэрэг гарсан юм.

Энэтхэгийн араас Афганистан, Сири, Сомали, Саудын Араб, Пакистан, Ардчилсан Конго, Йемен, Нигери, АНУ гэсэн улсууд эхний 10-т жагссан байна.

Энэ жил анх удаа эхний 10 оронд АНУ багтсан нь сүүлийн үед тус улсад #MeToo зэрэг эмэгтэйчүүдийн эсрэг бэлгийн дарамт, хүчирхийллийг илчлэх хөдөлгөөн идэвхжсэнтэй холбоотой гэж судлаачид үзэж байна.

Эх сурвалж: Independent