Б.Жаргалсайхан: Азиас хувцас авахаар өмд нь шорт, цамц нь майк болчих юм

Өнгө үзэмж гэж байгаа бол 25-р телевизээр Гүндалай гуай аягүй хөөрхөн, Жагаа хамгийн царай муутай болж байна гэсэн. Би эмэгтэйчүүдийг тэгж дугаарладаггүй. Хүн болгон гоё, өөрийн гэсэн өвөрмөц өнгө төрхтэй. Муухай хүн гэдэг ойлголт байхгүй шүү дээ. Тэр чинь харьцангуй ойлголт. Заавал алаг нүдтэй байвал гоё гэвэл утгагүй. Жоонигор мөртлөө цаанаа л нэг аятайхан байдаг биз дээ. Ямар сайндаа Европт Бельмондо гэдэг жүжигчин байхав дээ. Хамгийн муухай, хамгийн сайхан эр хүн гэдэг чинь тэр биз дээ.

-Би таныг хоёрхон цаг унтдаг гэж сонссон юм байна. Энэ нь таны эрүүл мэнд юм уу, гоо сайханд нөлөөлдөггүй юм уу?

-Хоёр цаг унтдаг амьтан гэж хаа байхав дээ. Монголчууд л юмыг  туйлшруулж ойлгодгоороо өөрсдөө  хоёр цаг унтдаг байх. Би хүний унтдаг цагт л унтаж, сэрдэг шүү дээ. Өдөрт зургаагаас найман цаг унтдаг.

-Энэ тухай сонсоод маш их гайхсан учраас асуусан юм л даа. Мэдээж эрүүл мэнддээ маш сайн анхаардаг байлгүй. Спортоор хичээллэдэг үү?

-Спортоор нэг их айхтар хичээллэдэггүй. Сүүлийн үед Холливудын стар болох гээд л том том төмөр өргөөд л, жаахан нас ахиад 50 хүрээд  ирэхээрээ бүгдээрээ зүрхний шигдээсээр үхчихдэг юм. Яагаад гэвэл хүний зүрх дийлэхгүй. Бид өнөөдөр агаарын сийрэгшилттэй, далайн төвшнөөс өндөр оронд төрчихсөн. Дээр нь маш их хлостеринтэй, өөх тос ихтэй хоол хэрэглэж байна. Судасны хатуурал, цусны булэгнэл ихтэй учраас зүрхний шигдээсээр үхэх боломж бүрдчихсэн. Тиймд спортын хүнд бэлтгэл аваад, дээр нь архиа уух юм бол сүйрнэ гэсэн       үг. Эрэгтэйчүүдийг хараад байхад ихэнхи нь импарт, элэг хоёроор явчих юм.

-Таны  өдөр тутам баримталж  хэвшсэн  зүйл тань юу вэ?

-Хоолоо л зөв хэрэглэх нь зүйтэй. Орой нэг их хоол идэх хэрэггүй. Би мах бага хэрэглэдэг. Ер нь өглөөний хоолоо өөрөө, өдрийнхөө хоолыг найзтайгаа зооглоод, оройн хоолоо дайсандаа өг гэдэг дээ. Иймэрхүү өндөрлөг газар чинь хэтэрхий цагаан хоол идвэл халгай шиг хатаж үхэх байлгүй дээ. Хоолны ариун цэвэр сайн сахиж, халдварт өвчнөөс урьдчилан сэргийлэх ёстой. Муудаагүй, хугацаа нь хэтрээгүй хүнсний бүтээгдэхүүн      хэрэглэж заншвал зохилтой.

-Та  сонгогчидтойгоо нэг удаа уулзахдаа “Аа энэ залуу бүдүүн, нүдэнд дулаахан залуу байна гээд л гадна төрхөөр нь хүмүүсийг битгий дүгнэж байгаач ээ” гэж аминчлан захиж байсан нь санаанд орчихлоо. Хэтэрхий туранхай харагдчихвий дээ ч гэдэг юм уу, гаднах төрхөндөө санаа зовдог уу?

-Өнгө үзэмж гэж байгаа бол 25-р телевизээр Гүндалай гуай аягүй хөөрхөн, Жагаа хамгийн царай муутай болж байна гэсэн. Би эмэгтэйчүүдийг тэгж дугаарладаггүй. Хүн болгон гоё, өөрийн гэсэн өвөрмөц өнгө төрхтэй. Муухай хүн гэдэг ойлголт байхгүй шүү дээ. Тэр чинь харьцангуй ойлголт. Заавал алаг нүдтэй байвал гоё гэвэл утгагүй. Жоонигор мөртлөө цаанаа л нэг аятайхан байдаг биз дээ. Ямар сайндаа Европт Бельмондо гэдэг жүжигчин байхав дээ. Хамгийн муухай, хамгийн сайхан эр хүн гэдэг чинь тэр биз дээ. Заавал алаг нүд гаргаж, Үхрийн гүзээ унжуулж, хөлс нь урсчихсан, хирээ үнэртүүлж, шиврээ ханхлуулчихсан хүнийг хөөрхөн гэвэл таарахгүй байлгүй дээ. Миний хувьд өөрийгөө нэг их тахир дутуу амьтан гэж бодохгүй байгаа. Аль нь байдаг юм бэ дээ, мэдэхгүй. Адаг сүүлд нь ажил хөдөлмөрөөр минь уралдуулдаг байсан бол одоо царай зүсээр минь уралдуулах нь дутаж гэнэ. Би ямар хүүхэн биш дээ. Хөөрхөн хүүхэн, миссүүдийн тэмцээн явуулдаг байсан бол улс төрч бизнесменүүдийг уралдуулах нь л дээ. Тэрэнд нь Гүндалай мисс нь болох нь тээ, толгой дээр нь титэм зүүгээд өгчихгүй юу, болно шүү дээ.

-Уучлаарай,  энэ  нь хэн нэгэнтэй уралдаж хэрэлддэг булан биш л дээ. Би таныг бизнесээ оёдлоор эхэлсэн гэдгийг мэднэ. Бодвол өөртөө хувцас оёж өмсч явсан байх тийм үү?

-Би хүүхэд ахуйдаа өөртөө өмдөө оёод л өмсчихдөг байсан санагдах юм. Ер нь тэр үеийн 40 мянгатын хүүхдүүд өөрсдийнхөө хувцсыг оёж өмсдөг байлаа. Одоогийнх шиг бэлэнчлэх сэтгэлгээгүй. Ямар ч байсан нүцгэн шалдан л яваагүйдэг.

-Хэр ганган жаал байв даа?

-Бүр нэг их айхтар ганган чамин болох гээд харсан юмаа аваад хацар дээрээ наагаад байдаггүй. Гэхдээ хүн өөртөө таарсан аятайхан хувцас өмсье гэж бодолгүй яахав. Одоо ч гэсэн тийм л зарчмыг баримталдаг. Хүн моод хөөхдөө хамгийн гол нь биш. Зохиж уу, зохиогүй юу гэдгээ мэдрэх хэрэгтэй ш дээ. Яаж ч гоё байгаад хаг нь бужигнаад, хир нь үнэртэх юм бол гоё хувцас өмсөөд яах юм бэ, тийм ээ. Харамсалтай нь манай зарим залуучуудын өмссөн хувцас нь нэг их үнэтэй ч, хиртэй, дээр нь жаахан бүдүүлэгдүү. Тэр нь өөрсдийг нь бүр байхгүй болгочихно. Тэр балмад байдлаа их гоё гэж сурталчилна.

-Хаг гэснээс үсэндээ ямар арчилгаа хийдэг вэ?

-Байхгүй ээ байхгүй. Миний үс байдаг л халимаг үс. Дуртай газраа очоод л засуулчихдаг. Үсэндээ усанд орохынхоо урьд тогтмол иллэг хийдэг.

-Үнэтэй хувцасны тухайд түрүүн ярилаа. Та мэдээж чанарлаг хувцас өмсдөг байх. Хувцсаа хаанаас худалдаж авдаг вэ?

-Өөртөө таалагдсан хувцсаа л өмсөнө. Европоос худалдаж авдаг. Азиас авах юм бол өмд өмсчихөөр шорт, цамц өмсчихөөр майк болоод хувирчихдаг учраас Европ руу ажлаар явахдаа авдаг юм.

-Хувцас гэдэг таны ойлголтоор?

-Зарим хүмүүс цуглуулдаг гэсэн. Би бол хувцсыг хэрэглээ гэж боддог. Хүн ажиллаж, амьдарч, аж төрөхөд зориулагдсан зүйл юм болов уу. Даарах, хөрөх, халахаас сэргийлнэ. Ямар марк биш дээ, хувцсыг цуглуулна гэдэг утгагүй. Ямар дизайнер ч биш дээ. Надад тийм шаардлагагүй. Маажгий гутлаа цуглуулаад байвал хэцүү дээ. Хувцас баярхаад байх зүйл биш. Хааны хувцас ч юмуу, Элтон Жоны нүдний шил ч юм уу, эсвэл Роллинг Стоунзийн куртка гэдэг сонин зүйл. Үнэндээ гол нь биш. Тэд эдэлж хэрэглэж байсан гэдэгт л учир утга нь оршдог. Хувцсыг хэрэглээ гээд зорилго болгоод явдаггүй. Байдаг л зүйлийг хэрэглэдэг.

-Алт, мөнгө сонирхдог уу?

-Үгүй ээ, байхгүй л байгаа биз дээ. /Арван хуруугаа дэлгэж үзүүлэв/

-Муухай эмэгтэй хүн байдаггүй гэсэн. Эхнэрийнхээ гоо сайханд хэр зэрэг хөрөнгө оруулалт хийдэг вэ?

-Би эмэгтэй хүний бас нэг амьдралын гол зорилго бол өөрийгөө гоё сайхан авч явах болов уу гэж боддог. Эмэгтэй хүн тэрэндээ өөрийгөө илүү их анхаарах ёстой. Эрэгтэй хүн тэрэнд нь боломж олгох хэрэгтэй гээд сэтгэл санааг нь, гоё сайхан явахад нь үргэлж дэмждэг. Бусдаар ногооноор уруулаа буд, цагаанаар хамраа буд гээд байвал хэцүү л байх, эсвэл майк өмсөөд яв, шорт өмс гэдэг нь утгагүй асуудал. Эмэгтэй хүн өөрийгөө илүү гоё харагдуулахын төлөө тэмцсэнээр түүнийг нь эрэгтэй хүн дэмжсэнээр илүү их таашаал авах ёстой гэж боддог.

-Эхнэртээ гоо сайхны бэлэг өгч үзсэн үү?

-Үгүй, үгүй. Хэзээ ч үгүй. Өөрөө авсан нь дээр. Би ямар гоо сайхны хэрэгсэл гэж мэдэж авч өгөх юм бэ, хор ч аваад өгчих юм бил үү. Арьсанд нь таарах ч юм уу, үгүй ч юм уу. Сонирхдоггүйдээ ч биш тэр хүний эрхийг зөрчөөд яах юм бэ. Хувцас өмсөхийг нь хүртэл заагаад, энэ чамд таалагдана, энэ чамд таалагдахгүй гээд байвал хэцүү шүү дээ.

-Өөлж төөлөхгүй юмаа гэхэд   хаяа санал нэмэрлэдэг л байлгүй дээ?

-Санал нэмэрлэх тохиолдол бий, бий. Наадах чинь чамд зохиж байна ч гэдэг юмуу, заримдаа сэтгэлд таарахгүй бол наадах чинь арай бараан, арай нилбэгэр юм уу даа гэх зүйл байлгүй яахав. Ямар наадахаа тайл гэлтэй биш.

-Зарим хүмүүс гадаадад хувцас хэтэрхий үнэтэй, монголоосоо авахад хямдхан гэлцэх болжээ. Энэ тал дээр та санал  нэгдэх үү?

-Монголд үйлдвэрийн бараакууд л зарагддаг. Эрээнээс нэг хоёр долларын хувцас эсвэл энд тэндхийн дэлгүүрийн үлдэгдлүүд орж ирэх болсон. Стандарт хэмжээгээ хангах хувцас цөөхөн. Моод нь хоцрогдчихсон, гандсан өнгөтэй, толботой, оёдол нь хажуу талдаа гарчихсан, угаахаар хамаг будаг нь хуурчихдаг тиймэрхүү л юмнууд байгаа шүү дээ.

-Ковбой малгай танд дориун зохисон харагддаг. Чөлөөт стилиэр хувцаслах дуртай юу?

-Наранд үрчлийтлээ харлаад сайртаад байлтай биш, чанартай зохимжтой бол аваад л өмсчихдөг. Тэрнээс фирм мирм нэг их сонин биш. Энэ нь яршигтай залхуутай санагддаг. “Буян” компанийн бүтээгдэхүүн миний ойлгосноор хүмүүст их л таалагдаж байгаа бололтой. Манай хүүхнүүд ихэнхи нь өмссөн харагддаг. Энэ бараа дэлхийн том том дэлгүүрүүдэд зарагдсаар ирлээ. Ялгаа нь гэвэл үнэ нь арав дахин илүү үнэтэй байх.

-Өөрийнхөө үйлдвэрийн бүтээгдэхүүнээс өмсдөг үү?

-Хааяа ганц нэг цамц өмсдөг. Өвөл даарч хөрөхөд илчтэй сайхан байдаг. Гэхдээ нэг их зорилго болгодоггүй.

-Уламжлал болсон ганц асуултаа асууя. Сүүлийн үед эрчүүд маань гоо сайхны косметик хэрэглэх болжээ. Таны хувьд?

-Мэдэхгүй. Ямар ч юм байдаг юм. Нүүрээ усаар, үсний шампуниар үсээ, биеэ угаадаг шампуниар биеэ угаахаас, тос элдэв янзын юм түрхдэггүй. Будаг хэрэглэж хөмсөг, сормуусаа буддаггүй. Зарим нэг мисс болоод байгаа аваргууд л буддаг байх. Тэгээд л хамгийн хөөрхөн шилдэг улс төрчид болдог биз. Миний хувьд бол шаардлагагүй. Ер нь эрэгтэй хүн нэг талаараа жаахан хэнэггүй байсан нь зүгээр дээ. Гэхдээ заваан бохир явахыг хэлээд байгаа юм биш.

-Наснаасаа  хөгшин харагдчихвий дээ гэсэн зовнил төрдөг үү?

-Тэр талаар нэг их боддоггүй. Амьдралын жам шүү дээ. Төрөх үхэхийн хооронд хөгшрөх нь үнэн. Түүнийг бүгдээрээ мэддэг учраас жаахан намбатайхан шиг хөгшрөх нь зүйтэй гэж  байгаа. Зарим нь насаа мэдэхгүй 18-тай юм шиг л далдаганаж, дэлдэгэнэж яваа харагддаг. Зарим нь яагаа ч үгүй хар нялхаараа нэг их догь суучихсан намбархуу юм яриад л, үг хэлээ зөөж ядаад л хамарт нь баас түрхчихсэн юм шиг ярвайж байх юм. Тэгэхээр онцгүй ш дээ. Хүн хөгжиж яваа нийгмийнхээ дэвшилд өөрийнхөө нас, зүс царайндаа тохирч явсан нь дээр болов уу. Түрүүлээд ч хэрэггүй, хоцроод ч хэрэггүй.

-Таныг ааш муутай гэдэг. Ааштайг нь бодохоор нүүр нь учиргүй үрчийчихмээр. Тулаад харахаар гайгүй л юм. Ер нь дотоод сэтгэлээ хэр удирдан захирдаг вэ?

-Гайгүй ээ, гайгүй. Надад сонгууль эхлэхээр л тийм цол зүүдэг юм. Одоо ч өшөө цаашаа сонгуульдаа бэлдэж байгаа биз. Сонгууль дөхөхөөр ааштай мааштай гээд зөндөө юм ярьдаг. Зарим нь мисс болоод, зарим нь хамгийн муухай царайтай нь болоод л. Дотоод сэтгэлээ удирдан захирах тал дээр муу болоод л хамаг юмаа ил гаргачихдаг даа. Юмаа дотроо хадгалдаг хүн чинь дотроосоо идэгдэж, гаднаасаа гунддаг биз дээ.

-Багын л ийм өндөр хүүхэд байсан уу. Зарим хүн гэнэт огцом өсдөг гэлцдэг?

-Нэг их өндөр биш ээ, гайгүй шүү дээ. 184 см тийм айхтар өндөрт орно гэж үү. Харин дэндүү намхан улсууд бол атаархдаг байхгүй юу. /инээв/ Би харин тэр намханчуудыг яагаад ийм намхан болчихвоо гэж асуумаар санагддаг. Би өөрийгөө стандарт гэж үздэг. Одоогийн залуучууд гоё л болж байгаа шүү дээ. Аравдугаар ангидаа өндөр байсан. Манай эцэг эх ч ийм дундаж өндөртэй хүмүүс. Би европын жишигт бол дундаж өндөрт тооцогдоно гэж боддог. Тэр Баабар маабараас “та яагаад ийм намхан болчихвоо” гэж асуувал сонин шүү дээ.