Г.Алтан САПУ худалдааны төвөө 19 сая доллараар МАК-ийн Б.Нямтайширт заржээ

Сүүлийн үед олны анхаарлын төвд байгаа нэгэн сэдэв бол “Олон овоот”-ыг тойрсон асуудал болон “Хадгаламж банк”-ны шинэ эзний тухай мэдээлэл байв. Хэдэн жилийн өмнө САПУ худалдааны төв шатаж түүний эзэн Г.Алтан чамгүй өрөнд унасан боловч өөрийн мэдэлд байсан бүх шатахуун түгээх станцуудаа “Жаст”-ын Ш.Батхүүд зарж олны хэл амнаас гарсан гэдэг. Тэгвэл саяхан САПУ худалдааны төвөө шинээр ашиглалтад оруулсан Г.Алтан захирал өөрийн хөрөнгийг долларын тэрбумтан МАК-ийн Б.Нямтайширт 19 сая ам.доллараар зарсан тухай мэдээлэл ирэв.

Овоо хэдэн ногоон халаасалсан тэрээр “Жаст”-ын Ш.Батхүү дээр очиж уулзаад “Одоо л нэг эргээд бизнесээ цэцэглүүлэх цаг болсон юм шиг байна” гэжээ. Хариуд нь Ш.Батхүү захирал “Шатахуун түгээх станцуудаа буцаан авах уу, тэгвэл” гэсэн аж. Харин Г.Алтан “Нэгэнт зарсан бизнесээ эргүүлж аваад яахав. Тэрний оронд “Хадгаламж банк”-ны чинь 51 хувийг авъя” гэсэн байна. “Олон овоот” руу байдаг мөнгөө цацчихсан Ш.Батхүү захирлын хувьд энэхүү саналыг хүлээн зөвшөөрөхөөс өөр аргагүйд хүрчээ. Тэрээр “Хадгаламж банк”-ин дээр хоёр өдөр өөрийн талын банкируудын хамт үйл ажиллагаатай нь танилцаж, бичиг цаастай зууралдсан байна. Хамгийн хачирхалтай нь, Чингэлтэй дүүргийн шүүхээр САПУ-ын хэргээ шийдүүлж байсан Г.Алтан захирал шүүгч Сарангэрэлийг тус банкны захирлаар тавих гэж зүтгүүлжээ. Гэвч энэ нь банкныхны зүгээс нэлээдгүй эсэргүүцэлтэй тулгарсан тул арга буюу менежментийн багийг хэвээр нь үлдээж, өөрөө зөвхөн хувь эзэмшигч хэвээр үлдсэн нь дээр гэж үзжээ.
О.Баяр (www.wikimon.mn)