Сонгуулийн сурталчилгааны арга барилаасаа салаач, Ерөнхийлөгч өө

“Монгол ялна, хятадууд сөнөнө” гэсэн утга бүхий сонгуулийн сурталчилгаа тань өнөөдөр “би ялна, бусад нь сөнөнө” гэсэн утгад шилжчихжээ. Үүнийхээ төлөө өөрийгөө тойрон хүрээлүүлсэн мөрөөдлийн багийнхнаар долоодугаар сарын 1-нийг давтахаас өөр аргагүй мэт сэнхрүүлгийг ард түмний дунд нийгмийн сүлжээгээр идэвхитэй явуулж, цөс ихтнүүдийг хөөргөж байгаад тань харамсмаар. Цахим ертөнц эрчээ аваад байгаа үед таны гэсэн бүхнийг өнөөдөр монголчуудаас гадна дэлхий нийт анхааралтай ажигладаг гэдгийг ухаараасай.

Уг нь та хэдийнэ Ерөнхийлөгч болчихсон, одоо арай томоор, өөрөөр асуудлыг харж, Монгол Улсын Ерөнхийлөгч шиг байж гадаад бодлогодоо анхаарлаа хандуулж, иргэдийнхээ эв нэгдлийн илэрхийлэл болж баймаарсан.

Гэтэл иргэдээ өдөөн турхирч, нийгмийн сүлжээг ашиглан хортой, хоржоонтой гэсэн бүхнийг хийж, УИХ-аар хэлэлцэж байгаа хууль бүхэнд л хориг тавихыг хүсч, асуудлыг урагшлуулах бус ухрааж байгаа тань таныг тойрон хүрээлэгсдэд л таалагдаж байгаа байх.

АНУ-ын Ерөнхийлөгч Дональд Трамп ажлаа аваад 1 жилийн хугацаанд хийсэн ажлаа тайлагнаж байгаатай адил та ч мөн ажлаа тайлагнах хугацаа ирнэ. Тэр үед ийм бөхийн холбооны ойд очсон, тийм байдлаар иргэдээ өдөөн турхирсан гэдгээс өөр хэлэх үгтэй, хийсэн үйлдэлтэй байхгүйн тулд Ардчилсан намын бас МоАХ-ны Ерөнхийлөгч шиг биш Монгол Улсын Ерөнхийлөгч шиг байгаач гэж таниас хичээнгүйлэн хүсч байна. Таалан болгооно уу.

У.Жанцан

POWER.MN