Олон нийт Н.Энхбаярт итгэл үзүүлэх магадлал өндөр байна

“Ерөнхийлөгчийн сонгуульд та хэнийг дэмжих вэ” гэсэн санал асуулгыг Батлан хамгаалахын сайд, УИХ-ын гишүүн Б.Бат-Эрдэнэ, МАХН-ын дарга Н.Энхбаяр нар тэргүүлсэн тухай мэдээлэл өчигдөр цацагдсан.

Батлан хамгаалахын сайд Б.Бат-Эрдэнэ ийнхүү олон нийтийн дунд нэр хүндтэй байгаа нь саяхан цацагдсан “Монгол тулгатны 100 эрхэм” нэвтрүүлэгтэй холбоотой гэдгийг ажиглагчид бичиж байгаа нь оргүй биш.

Одоогийн нөхцөлд УИХ-ын дарга М.Энхболд МАН-аас Ерөнхийлөгчийн сонгуульд нэр дэвшинэ гэсэн мэдээлэл байгаа. Энэ тохиолдолд Б.Бат-Эрдэнэ намаасаа гарч ирэх магадлал хомс. Шинэ Засаг байгуулагдсаны дараа түүнийг Батлан хамгаалахын сайдаар томилуулсан нь анхнаасаа Ерөнхийлөгчийн сонгуулиас холдуулах гэсэн холын алхам байсан мэт.

Ямартай ч МАН энэ удаад Ерөнхийлөгчийн сонгуульд Б.Бат-Эрдэнийг нэр дэвшүүлвэл ялалт байгуулах боломж өндөр байгаа нь тодорхой байна.  Мөн Б.Бат-Эрдэнээс дутахгүй нэр хүндтэй  өөр нэг эрхэм бол УИХ-ын дэд дарга Ц.Нямдорж. Тэрбээр Ерөнхийлөгчийн сонгуульд өрсөлдөх бодолтой гэдгээ илээр зарлаагүй ч сүүлийн үед хийж буй улстөрийн алхамуудаас нь харахад нь үзээд алдсан ч яахав гэсэн далд бодол тээж яваа гэлтэй.

Тэгвэл Сант маралын судалгаанд аман хүзүүдсэн МАХН-ын дарга Н.Энхбаяр энэ удаагийн Ерөнхийлөгчийн сонгуульд нэр дэвших нь нэгэнт тодорхой болсон гэнэ. Хууль эрх зүйн талаасаа ч Ерөнхийлөгчийн сонгуульд өрсөлдөхөд түүнд ямар нэгэн хаалт, хориг байхгүй гэдгийг намынхан нь ярьцгааж байгаа юм. Н.Энхбаярын тухайд Ерөнхийлөгчид нэр дэвшвэл ард түмэн түүнд ахин итгэл хүлээлгэхийг үгүйсгэхгүй. Үгүй ядаж л МАН-аас нэр дэвшигчийн хүчтэй өрсөлдөгч байж санал хуваах өндөр магадлалтай юм. Хэрвээ ингэж санал хуваагдвал АН-аас нэр дэвшигч дундуур нь гараад ирэх боломж бас бий.

У.Жанцан

Цензургүй.мн