Халдварт шар өвчнөөс сэргийлэх вакцин хийлгэхийн тулд

Халдварт шар өвчний тархалт хавар, намрын улиралд ихэсдэг аж. Сүү­лийн үед бага насныхан энэ өвчнөөр олноороо өвчлөх болж зарим цэ­цэрлэгт ч шар өвчин дэгд­жээ. Тиймээс ви­руст гепа­тит өвчнөөс сэр­гийлэх вакциныг хэрхэн хийлгэх талаар сурвал­жиллаа.

Ундны усны 71 хувь, хүнсний бүтээгдэхүүний 35 хувьд халдварт шарын А гепатит вирус байгааг мэргэжилтнүүд тогтоосон. Тэгэхээр хамгийн түрүүнд ундны усаа заавал бу­цал­гаж хэрэглэхийг эмч нар зөвлөж байна. Мөн гадуур зарагдаж байгаа самрыг огт хэрэглэхгүй байвал өөрийгөө өвч­нөөс сэргийллээ гэсэн үг гэнэ.

Халдварт шар өвч­нөөр хүмүүжигч нь өвдсөн цэцэрлэгээс нийт эцэг, эхчүүдэд шар өвчнөөс сэргийлэх вакцин хийлгэ­хийг зөвлөж буй. Гэхдээ шууд очоод вакцин хийл­гэх нь буруу гэнэ. Учир нь шарын халдвар авсан ч 15-50 хоног шинж тэмдэг нь илрэхгүй нууц байдаг аж. Тиймээс шин­жилгээг өгсөний да­раа заавал вакцин хийлгэх учир­тай. Халдварт шарын шин­жилгээг Халдварт өв­чин судлалын үндэсний төвийн лабортарид 5000 төгрөгийн үнэтэй хийдэг аж.

Нэгэнт сайн дураа­раа, мөнгөө төлөөд хийл­гэж байгаа учраас эрүүл мэндийн дэвтэр шаар­дах­гүй. Шинжил­гээний хариу нэг цагийн дараа гарна. Ингээд шин­жилгээгээр халдварт ша­рын халдвар аваагүй нь тогтоогдвол урьдчилан сэргийлэх вакцин хийл­гэж болно. Сайн дураа­раа хийлгэж байгаа уч­раас вакцин ч бас үнэтэй. 28100 төгрөгөөр А виру­саас сэргийлэх вакцин хийж байна лээ. Вакцин хийлгэсэн өдрөөсөө 15 хоногийн дараагаас дарх­лаа тогтож эхэлнэ. Хоёр дахь тунг нь зургаан сарын дараа хийлгэх учир­тай. Ингэснээр 15 жил А вирусын халдва­раас сэргийллээ гэсэн үг аж. Вакциныг нэг нас до­лоон сартайгаас эхлэн хийнэ гэж эмч ярьсан. Гэвч эцэг, эхчүүдийн ярианаас хоёроос дээш настай хүүхдүүдэд дээрх вакциныг хийж байгаа аж. Вакцин хийлгэсний дараа халуурах, бөөлжих зэрэг гойд шинж илэрдэггүй гэнэ.

Халдварт өвчин суд­лалын үндэсний төвд сайн дураараа вакцин хийлгэхээр ирсэн маш олон хүн байсан. Эхлээд шинжилгээ өгөх гэж ду­гаарлана, дараа нь вак­цинаа хийлгэх нь дугаар­лана. Вакциныг 15.00 цаг хүртэл хийдэг юм байна. Тэгэхээр өглөө эрт л очих­гүй бол зорьсноо бие­лүүлж чадалгүй буцах бололтой. Тэнд байсан эцэг эхчүүд томуугийн эсрэг вакциныг ч хүүх­дүүддээ хийлгэж байсан. Томуугаас сэргийлэх вак­циныг 10 мянган төгрө­гөөр хийж байна. Хоёр вакциныг нэг өдөр хийх боломжтой. Тэгэхгүй бол нэг төрлийн вакцин хийс­нээс хойш сарын дараа нөгөөг нь хийдэг гэнэ.

Ингэхээр нэг өдөр хоёр өөр өвчнөөс сэргийлэх вакцин хийлгэхийн тулд шинжилгээний төлбөр­тэйгээ нийлээд 43 мянган төгрөг шаардлагатай юм байна. Хэрвээ хүүхэд тань түрүүлгээ харж хэв­тээд, уйлагнаад, ноомой болоод байвал яаралтай эмнэлэгт хандахыг эмч нар зөвлөж байсан. Мөн баруун хавирганы доо­гуур өвдөх, арьс шарлах, бага зэрэг халуурах, өтгө­ний өнгө цайвар болж шээс өтгөрвөл, хоолонд дургүй болж бие сулрах зэрэг шинж илэрвэл шин­жилгээ өгөх шаардлага­тай болжээ гэсэн үг аж.

Б.ЦЭЦЭГДЭЛГЭР