“Чалко”-ийн өрийн үлдэгдэл 80 сая доллар болжээ

Монгол Улсын Засгийн газрын БНХАУ-ын “Чалко” компанид өгөх өрийн үлдэгдэл 80 сая ам.доллар болсон байна. Өнгөрсөн хугацаанд зүүн цанхиас олборлосон нүүрснийхээ 65 хувийг нь олборлогч “TTJVCO” компанийн ажлын хөлсөнд, 35 хувийг “Чалко” компанийн өрөнд өгч байсан юм.

Дэлхийн зах зээл дээрх нүүрсний үнэ аль хэдийн 200 ам.доллар давсан ч манай улс нүүрсний үнээ 30 ам.доллараас хэтрүүлж чадахгүй байгаа нь “Чалко”-гоос авсан зээлтэй холбоотой. Тэгвэл энэ оны нэгдүгээр улиралд багтаан зүүн цанхийн уурхайн үнийг 59.3 ам.доллараар худалдахаар болжээ.

Тодруулбал нүүрсний үнэ тогтоох дөрвөн индексийн хувь хэмжээний өөрчлөлтийн дагуу уурхайн аман дээрээс тонныг нь 59.3 ам.доллараар борлуулах боломжтой болсноо өнгөрсөн долоо хоногт “Эрдэнэс тавантолгой” компанийн зүгээс мэдэгдсэн билээ. Ингэхдээ энэ оны хоёрдугаар улирал хүртэл 59.3 ам.доллараар худалдах юм байна.

Т.Далай

Зууны мэдээ