Истанбулын шөнийн цэнгээний газарт халдлага болсны улмаас 35 хүн амь үрэгджээ

ИСТАНБУЛ. /ANADOLU/. Санта-Клаус шиг хувцасласан нэгэн этгээд Шинэ Жилийн баяр тэмдэглэж байх үед Туркийн Истанбул хотын шөнийн цэнгээний газар руу дайран орж, 35 хүнийг буудан хөнөөжээ.

Истанбул хотын даргын хэлснээр, орон нутгийн цагаар ням гарагт шилжих шөнийн 01:15 цагт тус хотын Ортакёй дүүрэг дэх “Reina” шөнийн цэнгээний газарт халдлага болох үеэр наад зах нь 35 хүн амь үрэгдэж, 40 хүн шархадсан байна.

Халдлага болох үед тус газарт 700 орчим хүн байжээ.

Аюулгүй байдлыг чангатгаж, халдлага болсон газраас 3 км-ийн радиус доторх бүсэд цагдаа нар харуул хамгаалалтад гарчээ.

“Энэ хэргийг мөрдөн шалгаж байна. Холбогдох мэдээ мэдээллийг цаг тухай бүрт нь өгнө” гэж тус хотын дарга Васип Сахин хэлэв.

Г.Доржханд

МОНЦАМЭ