“Монгол улсын тогтвортой хөгжилд хүрэх зам” дээд түвшний уулзалт зохион байгуулагдлаа

Монгол Улсын Их Хурлын Эдийн засгийн байнгын хороо, Ерөнхий сайдын ажлын алба, Байгаль Орчин аялал жуулчлалын яам, Сангийн яам, түнш байгууллагуудтай хамтран”Тогтвортой хөгжил 2030: Төлөвлөлтөөс хэрэгжилтэд” үндэсний чуулганыг зохион байгуулж байна.

Энэхүү чуулганы хүрээнд өнөөдөр “Монгол улсын тогтвортой хөгжилд хүрэх зам” дээд түвшний уулзалт зохион байгуулагдлаа.

Монгол улсын хөгжлийн бодлогын уялдаа холбоо, салбар дундын нэгдсэн зохицуулалт, төлөвлөлт, удирдлага, санхүүжилтийн тогтолцоо, хөрөнгө оруулалт зэрэг асуудлыг хэлэлцэж, олон талт хамтын ажиллагааг өргөжүүлж, хөгжлийн санхүүжилтийг нэмэгдүүлэх зорилготойтус уулзалтад УИХ-ын гишүүд, Ерөнхий сайдын ажлын алба, салбарын яамд, Монгол улсад суугаа элчин сайдын яамд, аймгуудын засаг дарга нар, эрдэмтэд, олон улсын байгууллага, хувийн хэвшлийн 160 гаруй зочид төлөөлөгчид оролцлоо.

Уулзалтад Монгол улсын ерөнхий сайд Ж. Эрдэнэбат илгээлт ирүүлж, УИХ-ын Эдийн засгийн байнгын хорооны дарга Д. Тэрбишдагва, БОАЖЯ-ны сайд Д. Оюунхорол, Сангийн дэд сайд Х. Булгантуяа, МУ дахь НҮБ-ын суурин төлөөлөгч хатагтай Беате Транкманн, Ногоон эдийн засгийн төлөөх түншлэлийн Ногоон эдийн засгийн асуудал хариуцсан дарга Асад Накви, БОАЖЯ Ногоон хөгжлийн бодлого, төлөвлөлтийн газрын дарга Т. Булган, Үндэсний статистикийн хорооны Эдийн засгийн статистикийн газрын дарга Э. Эрдэнэсан, НҮБ-ын байгаль орчны хөтөлбөрийн ахлах зөвлөх Марк Халле зэрэг төлөөлгчид илтгэл тавьж нээлттэй хэлэлцүүлэг хийсэн юм. 

БОАЖЯ-ны сайд Д. Оюунхорол үйл ажиллагааг нээн үг хэлэхдээ:

“Бид байгаль дэлхийгээ эвдэрч сүйрсэн хойно нь нөхөн сэргээх гэж оролдох бус хайрлан хамгаалах шаардлагатай. Иймийн тулд бид тогтвортой хөгжлийг хангах, байгальд ээлтэй хөгжлийн загвар бий болгохыг эрмэлзэж байна” хэмээгээд “Тогтвортой ногоон хөгжлийн төлөөх түншлэлийн уриалга”-ыг санаачилж, албан ёсоор танилцууллаа.