Хийлч Дээгий: Эмэгтэй хүн эзэмдүүлэхдээ дуртай байдаг

Өөрийгөө дэндүү сайн мэддэг, дураараа, эрх хонгор түүнтэй ярилцан суухад цаг хурдан өнгөрсөн байлаа. Тэсвэр хатуужлынх нь наана тодхон гэрэлтэх түүний харц, эмзэг зөөлөн бүсгүй ааль эрхгүй л сэтгэл татам. Энэ удаа би эрхэмсэг бүсгүй хийлч Дээгийтэй ярилцсан юм.

Анхны гэсэн тодотголтой юм бүхэн цаанаа гэгээлэг, нандин дурсамж агуулж байдаг. Хоёулаа таны анхны уран бүтээлийн дурсамжаар ярилцлагаа эхэлье. 

Уран бүтээл гэдэг их холын зам. Хамгийн анхны өөрийнхөө хэв маягаар хийсэн бүтээл маань “Хэнтийн өндөр ууланд” байсан юм. Мэдээж түүнийг хийхээсээ өмнө маш олон концерт хийж байсан. Оргилуун гурвал гээд гурвуулаа тоглодог үедээ дуурийн театрт тоглолтоо хийж байсныг хүмүүс санаж байгаа байх. Миний уран бүтээлийн үе 2001 оноос эхэлсэн юм байна. Арван таван жилийн ойгоо хийхээр болчихож. /инээв/

Сүүлийн хоёр жил таныг Авьяаслаг Монголчууд шоунаас л харж байна. Шүүгчээр ажиллах ямар байна?

Би хувь хүнийхээ хувьд хүн шүүх дургүй. Хэнд ч хэнийг ч шүүх эрх байхгүй. Харин стандарт өндөртэй шоунд шүүгчээр сонгогдчихлоо. Миний хувьд хар багаасаа л өөрийгөө шалгуулж, урлагийн тогоонд чанагдаж явсны хувьд бусдын авьяасыг шүүх нь миний чадвар. Түүнээс биш нэг их гоё модель хүүхэн шиг хүний харцыг татаад суух нь надад чухал биш. Хүмүүс тэр талаас нь их хардаг юм шиг байгаа юм. Гоё харагдаж байна лээ гээд л… Мэдээж сайхан харагдах нь гоё л доо. Миний хувьд оролцогч орж ирээд хоёрхон минутад авъяасаа үзүүлэхийн цаана тэр хүний ард хэчнээн хүний хөдөлмөр, ямар их зүтгэл шингэсэнийг нь олоод харчих юмсан даа л гэж боддог. Хийл хөгжимд ямар нэг тодорхой энд дар гэсэн өгөгдөл байхгүй. Бүгдийг баримжаа сонсгол хоёроороо нийлүүлэн тоглодог. Тийм болохоор дотоод мэдрэмж аливааг баримжаалах чадвар маань маш сайн хөгжсөн.

Шүүгч хийхээс өмнөх Дээгий ба одоо өмнө минь суугаа Дээгий хоёрын хооронд ямар нэгэн өөрчлөлт гарсан уу?

Хүн чинь үргэлж өсч хөгжиж байдаг. Өмнө нь хөгжмөө тоглоод л, дотоод сэтгэлээ тэгж их илэрхийлж байгаагүй. Шаардлага ч байгаагүй гэх үү дээ. Харин шүүгч болоод өөрийнхөө бодол, дотоод мэдрэмжээ ил гаргаж байна. Тэр ч утгаараа миний дотоод ертөнц хүмүүст илүү нээлттэй болсон. Хүн өөртөө маш их итгэлтэй болох хэрэгтэй юм байна гэдгийг мэдэрсэн. Заримдаа эргэлзээд л за энэ миний зөв болов уу, буруу ч юмуу гээд л дотогшоогоо залгидаг. Харин тэгэхгүйгээр бодсон санаснаа зоригтойгоор гаргаад тавьчихдаг боллоо. Надад алдах юм байхгүй шт. Тэгэхээр энэ талын чадварууд маань өссөн гэж хэлж болно.

Таныг шүүлт хийхдээ хүйсээр ялгалаа, эрчүүдтэй сээтгэнэлээ гэх мэтээр шүүмжилж байна. Энэ тал дээр та юу гэх вэ?

Эмэгтэй хүн болж төрсөн нь миний буруу юм болов уу?/инээв/ Хүмүүс нэг юмыг ойлгоосой. Энэ бол хуулийн төсөл боловсруулах процесс биш. Үүнийг тийм айхтар ноцтой хүлээж авах ямарч шаардлага байхгүй. Мөн чанар нь энэ чинь өөрөө шоу. Тийм биздээ. Би Засгийн газрын гишүүн болчихсон хуулийн төсөл боловсруулах гээд сууж байгаа бол өөр. Ард түмэн зурагт үзэхдээ хэрүүл харан уурлаж, стрессдэхийг хүсдэггүй биздээ. Би кино үзэхдээ ч юмуу түүндээ төвлөрч, өөр юу ч бодохгүй байхыг хичээдэг. Миний анхаарлыг өөр тийш нь  татахгүй байгаа тийм л  кинонд сэтгэл минь цаддаг. Яг тэрэн шиг шоу маань тийм л байх ёстой. Мэдээж бүх хүнд таалагдах албагүй. Ойлгох нэг нь ойлгоод л үзнэ. Надад хүлцэл өчих шаардлага байхгүй. Энэ бол ард түмнийг цэнгүүлэх зорилготой шоу нэвтрүүлэг.

Танд хөтлөгчөөр суухад чинь өгөгдсөн дүр бий юу?

Бид өөрсдөө энэ шоуны шүүгчдийн сонголтыг үнэхээр гайхаж байсан. За Чука ахыг яахав ойлгож байна. Чимгээ эгчийг сайн мэдэхгүй, Rokit bay-ыг бүр анх удаагаа харсан. Хэн бэ, хаанаас ирсэн юм, юун тэр реппер энэ тэр. Би огт сонирхож байгаагүй. Яагаад биднийг сонгосон юм бол гээд гайхаж байлаа. Гэтэл шоу маань өөрийн гэсэн дотоод дүрэмтэй. Дэлхийн 65 оронд зохиогдсон хамгийн амжилттай шоуны нэг. Аль ч оронд хүн төрөлхтөн бүгдээрээ л адилхан. Тэр олон сая хүнд таалагдаж чадсан гэдэг утгаараа биднийг ч бас дагуулсан. Шүүгчдийг ч бас тодорхой хэмжээнд тэр л шалгуураар сонгосон. Амьдрал дээр бид дөрөв шуудайнд хийсэн эвэр шиг хүмүүс л дээ. Мэдээж дөрвөн найзыг шүүгчээр суулгачихсан байсан бол юу болно гэж бодож байна. Хүмүүст хэзээч сонирхолтой байхгүй л байхгүй юу. Ямар найраа хийх гээд сууж байгаа биш. Гэхдээ шүүгчдийн сонголт бол гайхалтай байлаа. Дүрийн хувьд бол намайг өөрөөрөө л бай гэсэн. Хэн нэгэнд доромжлуулах болов уу, эвгүй харагдчих юм болов уу гэж намайг айхгүй гэдгийг мэдэж сонгосон болов уу. Би анх удаа 33 камерын өмнө сууж үзсэн. Хоёр дахь жилдээ арай дассан байна. Харин хүмүүст аятайхан харагдах гээд үгээ цэгнэчихвэл надад тэнд суух шаардлага байхгүй. Намайг угаасаа тэгж ч сонгоогүй. Хүмүүс маяглаад байна гэж бодоод байх шиг байгаа юм. Би чинь амьдрал дээр их хөгжилтэй хүн ш дээ. Ямар нэгэн найр, хурим, баярт очоод үнэхээр nice байя л гэж боддог. Түүнээс биш хүний гутал хувцас бүртгээд эсвэл өөрийнхөө юу өмссөнийг харуулах гээд очдоггүй. Миний өмнө хүн байгаа л бол хүний нүд рүү хараад сайхан энергийг нь мэдрээд, жаахан халаад, сэтгэл хангалуун байж, найр хуримын халаагч байх дуртай. Хүнийг доргиох чинь гоё ш дээ. Тэр бол жинхэнэ би. Надад хэзээ ч ичих юм байхгүй. Шоуны хувьд би зүгээр л чин зүрх сэтгэлээсээ ажлаа хийж байгаа л хүн. Мэдээж сошиал ашигладаг надад хүмүүсийн хэл амыг мэдэхгүй өнгөрөөд байгаа юм байхгүй. Би бүгдийг харж байгаа. Дээгийг үзэн ядагчдын групп ч гэнэ үү. Тэр нь одоо хэдэн мянган лайк хүрч байгаа ч юм бүү мэд. Надад харамсаад байх юм алга.

Хүн л юм чинь эмзэглэж л таараа. Эмэгтэй хүн чинь буруугаар ойлгогдохоор гомдмоор санагддаг. Майга хөлтэй гээд хэлүүлчихээр яаж эмзэглэдэг билээ дээ. Гэтэл тэрнээс илүү элдвээр хэлүүлээд би яах ч үгүй гэвэл худлаа л байхгүй юу. Эмэгтэй хүн л юм чинь эмзэглэнэ. Гэхдээ хүнд нэг л юм байдаг. Тэр нь чин сэтгэл. Үнэн сэтгэлээр юманд хандсан хүнд харамсах юм байдаггүй. Би энэ шоунд үнэнч байсан. Би ажлаа л хийсэн. Хэнийг ч би хуураагүй. Тиймч учраас би өөртөө итгэлтэй байдаг. Харин манай шоуныхан надад хэлэхдээ анх Simon-д хүн болгон дургүй байсан. Public-ийн хошуу эргэдэг. Одоо түүнд дургүй хүн байхгүй. Бүгд түүнд дуртай болж, түүнийг хайрладаг гэж хэлсэн. Сэтгэлээсээ ажиллаж байгаа надад гомдоод байх зүйл ч алга. Үнэнхүү авьяастныг тодруулах том зорилго бидний урд байна.

Авьяаслаг Монголчууд шоуны оролцогч О.Баярсайхантай та лагер явсан уу?

Тэрийг оньсого мэт үлдээсэн дээр болов уу… Олны үг ортой ч байж мэднэ. /инээв/ Яг үнэндээ лагер дээр хамгийн гоё байдаг биз дээ. Хотод гэртээ бол нэг өөр. Харин байдаг газраасаа гараад агаар салхинд гарахаар өдөр тутмын биш онцгой мэдрэмж төрүүлсэн юм зөндөө болдог. Тэрийг л би санагалзаж хэлсэн.

Яахав таны хэлсэн зүйлс эмэгтэй хүний дотор байдаг мөрөөдлийн нэг л дээ. Дүрэлзсэн галын хажууд хэн нэгний мөрийг түшээд сайхан дуу аялуулаад сууна гэдэг…

Мөрөөдөж болно. Гэхдээ бодит үйл хэрэг болгоход тийм ч хэцүү зүйл биш. Амьдрал өөрөө богинохон. Хүүхнүүд ингэх юмсан, тэгэх юмсан л гэж ярих дуртай. Тэрнийхээ оронд зүгээр л хийчээч. Яг өнөөдөр. Эсвэл хэзээ ч юм. Би хүүхнүүдийг доторхи нууцхан хүслээ залуудаа харамгүй хэлж чаддаг байгаасай гэж хүсдэг. Хэлж чадахгүй юмаа гэхэд сэдлийг нь зоригтой тавьж чаддаг байх хэрэгтэй. Харин залуучууд нь жаахан зоригтой баймаар юм. Сүүлийн үед залуус эмэгтэй хүнээр удирдуулчих гээд үзэж тараад байх шиг. Чамд анзаарагдаж байна уу. Эмэгтэй хүнээр гуйлгуулчих гээд л… атал эр хүний зоригтой байдалд хүүхнүүд бид чинь дуртай л байдаг шт. Тэнэг зориг гаргасан ч миний төлөө хийсэн юмдаа гэж бодохоор гоё байдаг. Үсрээл тэнэгтдэг байна шт гэж бодно. Яадаг юм. Эмэгтэй хүн эзэмдүүлэхдээ дуртай. Ер нь эрэгтэй хүмүүс хүүхнүүдийн эмэгтэйлэг зан чанарт их татагддаг. Харин хүүхнүүд маань мэдрэмжээ олсон сээтгэнэлийг гаргаад сурчих хэрэгтэй. Бид өөрөө өөрсдийнхөө мэдрэмж, хүслээ гаргаад хэлье гэхээр ичээд жинхэнэ амсах ёстой жаргалаа өөрөө өөрсдөө булшлаад байдаг. Бурхан бидэнд маш ихийг өгсөн. Зөөлөн уруул, аядуухан харц бүр нэг бүх л юмыг өгчихсөн байхад түүнийгээ ашиглах дургүй. Аймхай.

Карьер хөөхөөр нэг талд гэр бүл үр хүүхэд орхигдох гээд, тэднийгээ хэт их анхаараад эхлэхээр ажил цалгардах гээд байдаг. Та үүнийг хэрхэн амжуулж, хослуулж байна?

Эмэгтэй хүн хүүхэд гаргана. Тэр ч утгаараа гэр бүлдээ үйлчилдэг. Гэхдээ урлагийн хүн байна гэдэг их хэцүү. Тайзны хүн шүү дээ бид чинь. Маш их форм шаардана. Хаа хамаагүй байж болохгүй. Хүүхдээ хөхүүлж байгаа, би ээж болсон гээд өөрийгөө орхигдуулж тайзан дээр муухай байх эрх байхгүй. Би өөрийгөө карьер хөөх талын эмэгтэй гэж боддог. Надад олон хүүхэд гаргаад гал тогоондоо зогсож байх юмсан гэж хэзээ ч бодогдож байгаагүй. Хэчнээн сайхан хүү гаргасан ч гэлээ гал тогоондоо зогсож байгаа минь надад тийм ч их жаргалтай санагдаагүй. Хүүхдээ хооллох нь сайхан л даа. Гэхдээ миний энэ хорвоо дээр ирсэн үүрэг даалгавар их өөр юм шиг санагддаг. Тийм болхоор бурхан надад олон хүүхэд заяагаагүй байх. Зарим нь олон хүүхэдтэй зарим нь ганц хоёрхон хүүхэдтэй байдаг нь бурхны өгөгдөл юм бишүү.

Анхны хайр бүтдэггүй гэлцдэг. Таны анхны хайр ямар хүн байсан бэ?

/бодлогшров/ Би санахгүй байнаа. Хүүхдүүд 10-н жилд байхдаа гарнаасаа хөтлөлцөөд л үерхэж байна гээд л гүйдэг байсан. Надад тийм үе байгаагүй. Үеийнхээ залуутай гудамжаар хөтлөлцөөд явсан билүү яалаа. Үерхэж үзсэн юм болов уу? /инээв/

Та хайрлагдсан эмэгтэй мөн үү?

Мэдээж тэгэлгүй яахав. Би хайрлагдсан эмэгтэй. Тэр их хайрыг амсахын тулд өөрийгөө бэлтгэж чадсан эмэгтэй хүн.

Хоёулаа таны ажил мэргэжил рүү яриагаа хандуулъя. Ингэхэд яагаад урлагт хөл тавив?

Хувь заяаны эргүүлэг юмуу даа. Миний бага нас тэр чигтээ л хөгжим бүжгийн сургуультай уяатай. Би бусад хүүхдүүд шиг хөгжим бүжгийн сургуульд шалгалт өгч, урлагийн хүн болно энэ тэр гэсэн мөрөөдөл төлөвлөгөөтэй байгаагүй. Явж байсан цэцэрлэг маань хөгжим бүжгийн сургуультай их ойрхон. Дээр үед их бүх юм бодлогын чанартай. Багш нар цэцэрлэгүүдээр явж хүүхдүүдээ хайж авъяастай хүүхдээ өөр дээрээ авдаг байсан юм шиг байгаа юм. Би цэцэрлэгээсээ шалгагдаад орж байсан. Урлагийн ээж Алтанцэцэг маань намайг сонгосон. “Чигчий хуруу нь их жижигхэн, гэхдээ нүд нь их ухаантай, яагаад ч юм орхиж болохгүй хүүхэд шиг санагдсан” гэж багш маань хэлж байсан. Хуруу маань ургачихсан ш дээ. /инээв/ Би одоо болтол багштайгаа холбоотой байдаг. Бараг л ээж охин хоёр шиг.

Та өөрийгөө хэрхэн хөгжүүлж байв?

Ер нь 8-р ангид л том хүн болох суурь тавигддаг юм шиг байгаа юм. Тэр үед энд тэнд тоглолтонд их ордог байсан. Одоо бодоход хүн яг нэг юмаар хичээллээд түүндээ цагаа зарцуулж чадах юм бол үр шимийг нь хурдан хүртэж эхлэх хэрэгтэй. Тэгэхээр хүн түүнийхээ амтанд илүү ордог. Түүнээс биш мундаг болж байгаад их мөнгө олно энэ тэр гэдэг бол надад худлаа санагддаг. Би 1-р ангиасаа эхлээд найман жил хийл тоглож сурсан. Арван тав зургаан настайгаасаа ресторанд юмуу янз бүрийн арга хэмжээн дээр тоглодог байлаа. Анхны Франц ресторан нээгдэж байхад очиж тоглоод л… Тэгэхээр аливаа юмны үр шимийг хүртэж байгаа биз. Тоглоно гэдэг өөрөө бүтээлч сэтгэхүйг давхар хөгжүүлдэг. Шалгалтаас шалгалт руу хийх ёстой юмаа хийгээд сураад явна. Гэхдээ давхар хүний өмнө тоглож байгаа юм чинь юу тоглох уу гээд л хайлт хийнэ. Яваандаа хүний дуртай дургүй юмыг мэдрээд эхлэнэ. Тийм болохоор маш олон төрлийн ач холбогдолтой. Тухайн үедээ багш нар маань их дургүйцдэг байлаа. Гадуур тоглохоор хичээлээ давтсангүй, одоо ингээд буруу замаар орлоо гээд загнадаг байсан. Гэтэл яг үнэндээ хүн чинь сурж байгаа юмныхаа үр ашгийг тухай тухайн үед нь гаргаж байх хэрэгтэй. Би оюутан байхдаа баян байсан гэж хэлэхгүй ч ямар ч байсан автобусныхаа мөнгийг хэн нэгнээс гуйхааргүй л оюутан байлаа. Ер нь их эрт биеэ даасан. Тэр бол миний маш том сургууль. Зөвхөн өөрөө өөртөө найдаж, амьдралаа өөрөө аваад явах нь миний амьдралд хамгийн хэрэгтэй байсан. Түүнээс биш бусдад найдаж хэн надад туслах бол гэж яваад яахав дээ. Одооны хүүхдүүд нэг л их шалгалтанд бэлдсэн хүмүүс. Яг үнэндээ тэр нь амьдралд нь хэрэг болж ч байгаа юмуу бүү мэд.

Хөгжим бүжгийн коллежид таныг Камертоны Болд, Мээдээ нартай хамт сурж байсан гэлцдэг. Тэд багадаа ямар хүүхдүүд байсан бэ? Бага насныхаа дурсамжаас хуваалцаач…

Хүн өөрийгөө багадаа яг ямар байснаа нээг их дурсан санаад байдаггүй юм байна. Харин ойр тойрныхоо багш, ах нараасаа сонсохоор намайг багадаа их өөрийн гэсэн бодолтой, биеэ даасан, зоригтой хүүхэд байсан гэдэг. Ангид нэг галзуу охидууд байдаг даа. Би тийм байгаагүй. Дотогшоогоо өөрийгөө их сонсно. Жаахан хэнэггүй гэмээр ч юмуу. Тийм биеэ барьсан хүүхэд л лав байгаагүй.

Яг үнэндээ өнөөдөр л зах зээлийн үе гээд байгаа болохоос цаг үе асар хурдан өнгөрч байгааг анзаарах ч сөхөө байдаггүй. Миний бага нас социализмын үед өнгөрсөн. Хувийн гэх асуудал огт байгаагүй. Бүх юм хувьсгалын. Бүгд социализмын төлөө гэдэг байлаа. 1986 онд сургуульд ороход хорвоо дэлхий тэр чигтээ л социализм байсан. Монгол Орос гэдэг хоёр орон л байдаг юм шиг санагддаг байсан. Оросын системээр л биднийг өсгөсөн. Дээд үеийн төгсөгч ах эгч маань Орос руу автоматаар сургуульд явж харин биднийг төгсөхөд бүгд бор зүрхээрээ бие биеэ даагаад явах нийгэм угтаж авсан. Тэр үед хэл сурах шаардлага бий болсон. 1995 оноос эхлээд англи хэл сурах нь маш чухал болж ирсэн. Ангийнхан маань цаашаа СУИС-д сурч харин би ТИС-ийн Гадаад хэлний сургуульд орсон.

Харин хөгжим бүжгийн сургууль маань хүүхдийг маш их үүрэг хариуцлагатай болгож хүмүүжүүлдэг. Нэг жилд арван хоёр шалгалт өгнө. Шалгалтаас шалгалт руу… Тэр сургуульд хэн ч зүв зүгээр байна гэж байхгүй. Багаасаа үүрэг хариуцлага зорилготой өсчихсөн болохоор хүн чинь том болсон ч зүгээр сууж чадахаа больчихдог. Манай ангийн бүх хүүхэд урдаа тавьсан зорилготой, уран бүтээлчид болоод явж байна. Манай анги хоёрхон бандитай байсан. Эрэгтэй хүмүүс чинь их дотогшоогоо хэрнээ асар их ухаантай. Болдоо, Мээдээ хоёр маань багаасаа их мундаг хүүхдүүд байсан. Саяхан би нэг загварын шоунд явсан юм. Тэгэхэд манай Мээдээ гарч ирээд ямар гоё дуугаар яасан гоё хөтөлсөн гээч. Тэгэхэд надад ангийнхаа хүүхдээр бахархах сэтгэл төрж байлаа. Хүний торгон мэдрэмж гэж бас байна ш дээ. Үнэхээр бид цаг үеийг эзэлж байгаа юм байна гэх бодол төрсөн. Урдаа барьдаг үеийнхэн бид л байна. Эр эмгүй хүүхэд гэж гологдохгүй, тавь жаран нас хүрээгүй юм үзсэн боловсролтой, гоо үзэсгэлэн бүрдсэн сайхан насан дээрээ явж байна гэхүү дээ.

Таны амьдралын аль үе танд хамгийн хэцүү байсан бэ? Сүүлийн үед гэр бүл салалт их боллоо. Энэ тал дээр та ямар бодолтой явдаг вэ?

Мэдээж хүний амьдрал л юм чинь янз бүрийн юм тохионо. Яг үнэндээ монгол эрчүүд маань хүүхнүүддээ гологдоод байна. Яагаад гологдоод байгаа юм бэ гэхээр суурь хүмүүжилд нь байгаа юм. Эрэгтэй хүн хүндлэгдэх хайрлагдах ёстой гэдэг хэрнээ үүрэг хариуцлагатай байх, айл гэр авч явах ёстой эр хүн гэдгийг нь ухамсарт нь суулгаж өгөхгүй өсгөөд байна. Нас биенд хүрч, эхнэр авсан ч гэсэн хүүхэд хэвээрээ байгаад байх шиг. Харин манай монгол хүүхнүүд хаана ч дасан зохицоод амьдрах чадвартай. Салалтын хувьд эр нь эрийнхээ ажлыг хийхгүй эм нь амьдралд нухлагдаад ирэхээр салалт үүсч л таараа. Миний хувь нөхрийнхөө ээжид маш их баярладаг. Үнэхээр нөхрийг маань эмэгтэй хүнийг хүндэлж хайрлах ухаанд сургаж, түүнийг минь маш сайхан хүмүүжүүлжээ. Би өөрөө ганц хүүтэй. Хүүгээ эмэгтэй хүнийг хайрлаж хүндэлдэг жинхэнэ эр хүн болгож хүмүүжүүлнэ гэдэг маш чухал гэж бодож байгаа.

Та ганцаардаж байна уу?

Би хамгийн сайн менежер, эсвэл продюсертай болж багаар ажиллаж үзэх юмсан гэж мөрөөддөг. Уг нь миний хийх ёстой зүйл бол хөгжмөө сайн тоглох. Гэтэл тоглолтын байрын бэлтгэл ажил гээд арын албандаа өөрөө гүйх шаардлагатай болдог. 2012 оны өвөл “Эгэл бус Эрхэмсэг” тоглолтоо циркэд хийж байлаа. Бэлтгэл ажлын явцад тэнд их хүйтэн хүмүүст тухгүй санагдахаар байв. Тоглолтын нэр нь ч гэсэн “Эгэл бус Эрхэмсэг” атал үзэгчдээ гадуур хувцастай нь суулгахыг хүсээгүй. Тэгээд онгоцны хоёр халаагуур авчирч циркийг дулаацуулах үүргийг ч хүлээж байлаа. Энэ бол монгол уран бүтээлчийн тайзны ард амсдаг үнэн дүр төрх. Тийм болохоор ард минь асуудалгүй ажиллаж чадах хамгийн сайн багтай болох юмсан гэж боддог.

Цаг гарган ярилцсан таньд баярлалаа.

Э.Сайнзаяа

time.mn