Увс аймгийнхан эх нутгаа харийнхнаас чөлөөлж, бахархам гавьяа байгууллаа харин төр малчдаар 6 сая $ төлүүлэн, гутамшигт ялагдал болгохыг оролдож байна

Увс аймгийн бараг ихэнх нутгийг, уугуул малчид нь хөл гишгэх газаргүй болтол эзэгнэчихээд дураараа дургин, байгаль орчныг сүйтгэж, орон нутгийнхныг хохироож байсан Хятадын Гладвилл компаний эсрэг Зүүнговь, Тэс сумын иргэд эрслэн боссон билээ.

Орон нутгаас шалгахад, анх зөвшөөрөл авах, ажил эхлүүлэхдээ л холбогдох бүх хууль дүрмийг зөрчсөн байсныг тогтоожээ. Үнэнд гүйцэгдсэн Гладвилл компани аргагүй хамаг юмаа ачин гарч явсан бөгөөд, хятадуудтай хуйвалдсан ашиг хонжоочид боож үхэх гэж байна.

Ашигт малтмалын газрынхан, Увс аймгийг бид мэдэх болохоос, нутгийн ардууд мэдэх эрхтэй субъект нь биш, орон нутгийн шийдвэрийг цуцлуулна гэсэн утгатай зүйл хэлж байгаа аж. Харин ингэж эх орноо харьтай нийлж устган сөнөөж байдаг газрыг өөрийг нь татан буулгаж, гадаадынханд үйлчилдэг мафийнханд хатуу ял хүлээлгэх хэрэгтэй.

Хятадын компани бид арав хоног ажлаа зогсоосноос 2 сая долларын хохиролд учирсан, малчдаар юм уу, улсаар төлүүлнэ гэж байгаа гэнэ. Мөн ашигтай ажилладаг байжээ? Ард түмэнд ашиг нь наалдаж байсан уу. Хятадууд дээрээс нь нэмж 6 сая доллар авна гэжээ. Ер нь яахаараа манай хуулийг зөрчсөн улс шийтгэл хүлээж, шоронд орж, хохирлоо барагдуулахын оронд олон сая долларыг манайхаар гаргуулан, өндөр шагнал хүртэж байх албатай юм? Тэгэх ёстой гэж олон хүн ойлгочихсон л байдаг юм билээ.

Тийм юм хаана ч байхгүй шүү дээ, өөрийнхөө амьдрал дээр наагаад жишээд бодоод үз л дээ. Танай гэр орныг нэг нөхөр түйвээчихээд, Чингис хааны одонгоор шагнуулж, танайхаас олон сая долларын төлбөр гаргуулна гэвэл яахав? Та зөвшөөрөх үү? Хятаддаа бол тэд цаазаар авахуулах хүмүүс шүү дээ. ЮНЕСКО-гийн тодорхойлсон нийт хүн төрөлхтний үнэт өвийг сүйтгэх дөхсөн учир.

Ард түмний гайхамшигт ялалтыг урвагч төр бүү гутамшигт ялагдал болгон хувиргачихаасай билээ?!