Загвар өмсөгч Э.Энхболд бааранд зодоон хийж, олныг түйвээсэн гэв үү

“Дэлхийн мистер-2013” тэмцээнд амжилттай оролцсон загвар өмсөгч Э.Энхболдыг хүмүүс урлаг судлаач, дуучин, жүжигчний мэргэжлээр сурч төгссөн гэдгийг төдийлөн мэддэггүй. “Говь” брэндийн нүүр царай болж явсан сайхан залуу урьд нь загварын ертөнц төдийгүй рок попын хүүхнүүдийг ч араасаа хуйлруулж байсан гэдэг.

“Урлах эрдэм” дээд сургуулийн багш, дизайнер Д.Отгонжаргалыг ханиараа сонгож, үрийн зулай үнэрлэсэн тэрбээр “Намайг карьер хөөх гэж эгчмэд бүсгүйтэй ханиллаа гээд гадуур их шуугисан. Үнэндээ бид хоёрт тийм их насны зөрүү байхгүй. Тэгээд ч би эхнэрийнхээ насыг хэлмээргүй байна. Бие биедээ анхны харцаар дурласан. Ямар ч байсан, бид хоёр хайр сэтгэлээр учирч хүү, охинтой болоод сайхан амьдарч байна” гэх тайлбарыг өгсөн байдаг.

Мөн олонд танигдахаасаа өмнө нэгэн найзтайгаа хамт “Tse pub”-ын салбарыг хариуцан ажиллуулдаг байснаа ч нуугаагүй аж. Энэ үедээ ойролцоо орших “Боргио” пиво борлуулдаг залуустай үйлчлүүлэгчээ булаалдан нударга зөрүүлж явжээ. “Эрчүүд л болсон хойно маш их шар хортой, тэгээд ч өөрсдөө юм хийж байгаа болохоор  тэрэндээ их улайрна. Тэндээс л өрсөлдөөн гэж юу байдгийг мэдэрсэн гэх үү дээ. Нэг шил пиво, ганц ундаа зарах гэж тэгж их үзэж тардаг байлаа.

Одоо бол тэр залуустай  маш гоё найзууд болсон. Бүгд амьдралын төлөө гэсэн сэтгэлтэй ажил үйлс нь ч сайн яваа бахархмаар залуучууд. Бид хааяа уулзаж тэр үеэ дурсч сайхан ярилцана. Өөрөө хөдөлмөрлөж амьдралдаа том хөрөнгө оруулалт хийн, туршлага хуримтлуулсан болохоор тэр цаг үедээ би хайртай. Тэрнээс биш би одоо тэгж баар ажиллуулдаггүй” гэж модель залуу нэгэн удаа дурсчээ. Өдгөө тэрбээр “Яг түүн шиг” шоунд амжилттай оролцож яваа бөгөөд тун удахгүй шинэ хүнээ хүлээж авахаар сэтгэл догдлон байгаа билээ.

Мэдээл.мн