Д.Зоригтын худал амлаж буйг Японы Элчин сайдын яамны мэдэгдэл илчлэв

УИХ-ын  сонгуулийн 49-р тойрогт АН-аас Эрчим Хүчний сайд, УИХ-ын гишүүн Д.Зоригт нэр дэвшиж буй билээ. Түүний сонгуулийн штабын албан ёсны мэдээлэлд  : 18-39 насны залуус Японд хөдөлмөр эрхлэх боломжтой боллоо, ирэх долоо хоногоос эхлэнэ гэх мэтээр бичсэн байсан юм. Тэгвэл Япон улсаас Монгол улсад суугаа Элчин Сайдын Яам үүнийг няцааж, дараах мэдэгдлийг гаргажээ. Уг мэдэгдэлд:

“Япон улсад дадлагажигч гаргах тухай товч тайлбар

2016 оны 6 дугаар сарын 17-ны өдөр

Сүүлийн үед Япон улсад дадлагажигч гаргах талаар хэвлэл мэдээллийн хэрэгсэл, цахим сүлжээгээр цөөнгүй мэдээлэл гарах боллоо. Ингэхдээ 10 мянга, 100 мянган дадлагажигч илгээнэ, өндөр цалинтай ажиллуулна хэмээн дурдсан байна. Үүнтэй холбогдуулан тус Элчин сайдын яаманд иргэдийн зүгээс санал хүсэлт, асуулт тогтмол ирсээр байна.

Иймд, бодит байдал ямар байгаа тухай товч мэдээллийг нийтэд хүргэх шаардлагатай гэж үзлээ.

Япон улсад гадаадын дадлагажигч хүлээж авах тухай хуулийн төсөл Японы парламентад өргөн баригдсан бөгөөд өнгөрсөн хаврын чуулганаар хэлэлцэн батлах ёстой байсан ч тодорхой шалтгааны улмаас хойшлогдсон билээ. Ирэх намрын чуулганаар уг хуулийн төслийг хэлэлцэхээр төлөвлөөд байгаа хэдий ч уг хуулийн төслийн талаар нийгэмд янз бүрийн үзэл санаа, зөрчилдөөн байгаа тул хэзээ батлагдах нь тодорхойгүй байгаа. Харин уг хууль парламентаар батлагдсан тохиолдолд Японд дадлагажигч илгээх сонирхол бүхий улс орнуудтай яриа хэлэлцээ өрнүүлж гэрээ хэлэлцээрүүдийг байгуулах ажил хийгдэх бөгөөд үүний дараа л тодорхой тоо, чиглэл, нөхцөл болзлын тухай яригдах учиртай. Өөрөөр хэлбэл, одоогийн байдлаар Японд илгээх дадлагажигчдын тоо, цалин хөлс, холбогдох бусад асуудлаар ярих нь эрт байна.

Энэ сарын эхээр УИХ-ын даргын Япон улсад хийсэн ажлын айлчлалын үеэр хоёр тал хөдөлмөр эрхлэлтийн салбарт явуулах хамтын ажиллагааны санамж бичигт гарын үсэг зурсан билээ. Гэхдээ энэхүү санамж бичиг нь аливаа тоо, нөхцөл, болзол агуулаагүй, аль нэг талдаа тодорхой үүрэг хариуцлага үүрүүлээгүй, ерөнхий агуулга бүхий баримт бичиг юм. Санамж бичгийн англи хэлээр үйлдэгдсэн эх хувийг Японы Эрүүл мэнд, хөдөлмөр, нийгмийн хамгааллын яамны http://www.mhlw.go.jp/file/04-Houdouhappyou-10501000-Daijinkanboukokusaika-Kokusaika/0000045844_4.pdf линкээр үзэж болно.

Япон улсын Засгийн газрын зүгээс монгол иргэдийн ахуй амьдралыг дээшлүүлэх, эрүүл мэнд, боловсролын орчинг сайжруулах, ажил хөдөлмөр эрхлэх бололцоог нэмэгдүүлэх зэрэгт ямагт анхаарч ирсэн бөгөөд цаашид ч тодорхой ажлуудыг хийх болно. Дээр дурдсан дадлагажигч гаргах асуудал ч үүнд хамаарч байгаа билээ. Иймд иргэд та бүхэн элдэв ташаа мэдээлэлд авталгүй, асуудал шийдэгдэн тодорхой болтол аливаа яарсан алхам хийхгүй байх нь зүйтэй болов уу? ” гэж бичжээ.

Ийнхүү илт худал мэдээлэл тарааж буй УИХ-ын сонгуулийн 49-р тойрогт АН-аас нэр дэвшигч Д.Зоригт болон түүний штабынханд ямар хуулийн хариуцлага оногдуулахыг иргэд хүлээж байна.

Э.Баярхүү

Д.Зоригтын албан ёсны page хуудас, сонгуулийн штабынх нь бэлтгэсэн албан ёсны мэдээ Япон улсаас Монгол улсад Элчин Сайдын Яамны албан ёсны мэдэгдэл: