“КТВ” караоке 17-20 орчим насны монгол охидыг гадны иргэдэд зуучилдаг байжээ

Баянгол дүүргийн 1-р хороо “Хөгжил” хотхоны нэгэн байрны баруун доод буланд байрлах “КТВ” нэртэй караоке шөнийн цагаар цаг хэтрүүлэн ажиллаж, улмаар гадаадын иргэдэд Монгол охидыг худалдан, наргиулж цэнгүүлэх явдал хэрээс хэтэрчээ.

Тус хорооллын оршин суугчид энэ тухай цагдаагийн байгууллагад удаа дараа мэдэгдсэн ч нэг бол дуудлага аваад ирэхгүй, ирэхээрээ “дотроосоо хаалга үүдээ түгжчихсэн байна” гэх зэргээр шалтаг тоочин арга хэмжээ авалгүй өдийг хүрсэн байна. Ингээд “Хөгжил” хотхоны иргэд “Босоо хөх Монгол” бүлгэмд хандаж мэдээлэл өгсөн байна. Иргэдийн өгсөн мэдээллийн мөрөөр тус бүлгэмийнхэн караокенд очиход 18-20 орчим насны 10 Монгол охин Хятад, Солонгос, Австрали зэрэг гадаадын иргэдтэй хамт байхыг илрүүлсэн байна. Энэ талаар “Босоо хөх Монгол” бүлгэмийн УЗ-ийн гишүүн Д.Чойпүрэвээс тодрууллаа.

-Энэ мэдээллийг хэзээ авсан бэ?

-“Хөгжил” хотхоны оршин суугчид энэ караокед Монгол охид гадаадын иргэдтэй зугаацдаг, тэдгээр охидыг зохион байгуулалттайгаар машинаар тээвэрлэн авчирч, улмаар шөнөжингөө наргиж цэнгэдэг. Наанадаж дуу чимээ, цаанадаж Монгол охидыг гадаадын иргэдэд зуучилж, худалдаж байгаа тухай харьяа цагдаагийн байгууллагад удаа дараа мэдэгдсэн ч зарим тохиолдолд дуудлага аваад ирэхгүй, ирэхээрээ “бид арга хэмжээ авч чадахгүй, чаддаг газар нь ханд” гэх зэргээр нэлээд удсан байна. Ингээд эдгээр оршин суугчид манай байгууллагад хандсан юм. Бид иргэдийн өгсөн мэдээллээр караокены үүдэнд хэдэн цагийн турш ажиглалт хийхэд … дугаартай хар өнгийн “Соната6” маркийн машинаар охидыг зөөж авчирч байсан. Мөн Хятад, Солонгос, Австрали зэрэг гадны иргэд, бас Монгол залуус ч дотор нь байлаа. Биднийг ажиглаж байгааг мэдээд хаалгаа түгжээд дотогш оруулсангүй. Энэ тухай хэвлэл мэдээлэлд мэдэгдэх нь зүйтэй гэж бодоод танайд мэдээлэл өгч, ирэхийг хүлээж байх зуур эд өөрсдөө дотроосоо цагдаа дуудчихсан байна. Энэ нь мөрөө баллах гэсэн арга гэж бид үзэж байна. Яагаад гэвэл өмнө нь зөндөө олон мэдээлэл аваад ямар ч арга хэмжээ аваагүй, ирсэн даруйдаа зөрчил гаргасан этгээдүүдийг биш биднийг бичиг баримтаа шалгуул гэх зэргээр шал өөр зүйл хийж эхэлсэн. Цагдаагийн байгууллагын хийх ёстой ажлыг бид хийж байна, бидэнд шалгах, саатуулах эрх байхгүй учраас дотогш орж ажлаа хий гэсэн шаардлагыг тавьсны дагуу дуудлагаар ирсэн цагдаа нар охидыг саатуулаад, харин залуусыг явуулчихлаа.

Манай сурвалжлах хэсгийг тус караокед шөнийн 04,00 цагийн үед очиход БГД-ийн цагдаагийн 2-р хэлтсийн алба хаагчид 17-20 орчим насны 10 орчим охидыг караокеноос гаргаж, хэлтэс рүүгээ авч явав. Бид хүний эрхийг хамгаалах үүднээс охидын зүс царайг харуулаагүй ч дунд сургуулийн сурагч болов уу? гэмээр цүнх үүргэвч үүрсэн байсныг хэлэх нь зүйтэй. Харин эдгээр охидтой зугаацаж байсан гадаадын иргэдтэй хамт яваа Монгол залуус ална, тална гэх зэргээр сэтгүүлчдийг харааж зүхэж байлаа.

Дуудлагаар ирсэн цагдаагийн алба хаагчид охидыг машиндаа суулгаад харин хамт байсан гадаад дотоодын иргэдийг саатуулалгүйгээр тавиад явуулсан. Харин караокены үүдэнд ажиглалт хийж, охидтой холбох ажил хийдэг гэх караокены ажилтан Л-ээс зарим зүйлийг тодруулсан ч тэрээр булзааруулсан хариултуудыг өгсөн юм.

-Энэ караокед хэзээнээс ажиллаж эхэлсэн бэ?

-Би ажилладаггүй, манай найз ажилладаг туслаач гэхээр нь өнөөдөр ирээд байж байлаа.

-Энд ийм хууль бус үйлдэл явагддагийг мэдсэн үү? Яагаад энэ гэмт хэрэгт хамтран оролцох болов?

-Манай найз иймэрхүү юм хийгддэг тухай ярьж байсан. Хүнд битгий хэлээрэй гэхээр нь хэлээгүй, бас цаана нь хүний амьдрал байгаа шүү дээ.

-Энэ караокед голчлон ямар хүмүүс үйлчлүүлдэг вэ?

-Хятад, Солонгос хүмүүс голчлон ирдэг гэсэн.

-Охидыг зохион байгуулалттайгаар авчирдаг, машинаар зөөдөг гэсэн?

-Охидтой эхэлж яриад, заримыг нь утсаар дуудаад, заримыг нь машинаар авчирдаг юм билээ.

Түүнчлэн “КТВ” караокены хууль бус үйлдлийн талаар мэдээллийг нуун дарагдуулдаг, нэг ёсондоо арыг нь даадаг цагдаагийн алба хаагчид ч бий гэх мэдээллийг зарим эх сурвалжууд өгчээ. Ямартаа ч сүүлийн үед охидын биеийг үнэлүүлдэг, худалдаалдаг гэмт хэрэгт цагдаагийн алба хаагчид холбоотой гэх мэдээлэл удаа дараа чих дэлсэх болсон нь Прокурорын дэргэдэх мөрдөн байцаах алба татан буугдсантай холбоотой гэх тайлбарыг туршлагатай хуульч өмгөөлөгчид хэлдэг юм. Бид энэ талаар эргэн мэдээлэх болно.

Э.Ууганзаяа

Эх сурвалж : nekh.mn