С.Баярцогт Хятадын компаниа Хонконгоос удирддаг байжээ

Монгол Улсын сайд, ЗГХЭГ-ын дарга, УИХ-ын гишүүн С.Баярцогтын нэр дээрх 1 сая гаруй ам.долларын нууц хөрөнгө болон оффшор компанийн тухай асуудал одоо ч хүмүүсийн анхаарлыг татдаг. Учир нь, энэ асуудлыг одоо ч нэг тийш нь болгож цэгцлээгүй нь цаанаа ямар нэгэн учир шалтгаантай хэмээн хардахад хүргэж, тэр хэрээрээ хүмүүсийн анхаарлын төвөөс холддоггүй. Тэгвэл С.Баярцогтын хувьд Олон улсын эрэн сурвалжлах сэтгүүлчдийн консорциумаас мэдээлсэн мэдээллээс эрс зөрүүтэй мэдэгдэл хийж, няцаахыг оролдсон.

Харин Олон улсын эрэн сурважлах сэтгүүлчдийн консорциум Монголын томоохон улстөрч С.Баярцогт Их Британийн Виржинийн аралд “Легенд Плас Лимитед Капитал” /Legend Plus Limited Capital/ хэмээх оффшор компанитай бөгөөд энэ компанийн нэр дээр Швейцарийн банкинд 1 сая гаруй ам.доллар нуугдаж байсныг мэдээлсэн. Үүнийг ч С.Баярцогт олон улсын сэтгүүлчдийн өмнө хүлээн зөвшөөрсөн. Түүнчлэн С.Баярцогтын “Хятадын Монгол” хэмээх асуудал цаашлаад Их Британи, Умард Ирландын нэгдсэн вант улсад Монгол Улсыг Хятадын нэгэн муж гэж үздэг үү эсвэл С.Баярцогт өөрөө Монгол Улсыг Хятадын нэгэн муж гэж бүртгүүлсэн үү хэмээх асуудал нэлээд шуугиан тарьж байсан. Тэгвэл “Дэлхийн хил дамнасан шилдэг эрэн сурвалжлах баг” уриатай Олон улсын эрэн сурважлах сэтгүүлчдийн консорциумын мэдээлэл болон бусад баримтад дурдсанаар С.Баярцогт өөрөө Монгол Улсыг Хятадын нэгэн муж болгож бүртгүүлсэн гэж харагдаад байна.

Тухайлбал, Олон улсын эрэн сурважлах сэтгүүлчдийн консорциумын мэдээлэлд дурдсанаар Хятад Улс, Монгол Улс, Улаанбаатар хот, Сүхбаатар дүүрэг, 7-р хороо, Сэлбэ хотхон ……. оршин суугч Сангажав овогтой Баярцогт “Легенд Плас Лимитед Капитал” компаниа Хонконгоос удирдаж, компанихаа үйл хэргийг Хонконгоос явуулдаг байсан гэж бичжээ. Тиймдээ ч Их Британийн Виржинийн арлын “Execorp Limited” компани болон С.Баярцогтын Хонконг дахь “Legend Plus Limited Capital” хэмээх Хятад компани хоёрын хооронд харилцсан баримт бичигт Хятад үг тэмдэглэгджээ.

Энэ нь Хятад стандарт бөгөөд англиар харилцсан ч компанийн нэрийг Хятадаар давхар бичдэг гэсэн үг. Хэрвээ С.Баярцогтын хэлсэнчлэн 1 сая ам.долларын 200 мянган ам.доллар нь түүний гэр бүлийн хөрөнгө, 800 мянган ам.доллар нь түүний гурван найзынх юм бол 200 мянган ам.доллар /400 сая төгрөг/ -ын төлөө УИХ-ын гишүүн, нөлөө бүхий улстөрч эх орноосоо “урваж эсвэл доромжилж” Хятадын Монгол болгосон байна гэж ойлгож болмоор.

Нөгөө талаас оффшор данстангууд хэмээн дэлхийн “шившгүүд”-ийн жагсаалтад нэрээ шивүүлж, Монголоос ганцаараа цоллогдон яваа С.Баярцогтод Олон улсын эрэн сурвалжлах сэтгүүлчдийн консорциум нэлээд ам муутай байгаагаа түүний талаар бичсэн мэдээллээрээ илэрхийлж түүний 1 сая гаруй ам.долларын эх сурвалж энэ гээд тойруугаар хэлээд байх шиг.

Анхнаасаа маш нууц байдалд, урьдаас сайтар төлөвлөж байгуулсан “Легенд Плас Лимитед Плас” компаниа С.Баярцогт 2008 оны есдүгээр сард Сангийн сайд болохынхоо өмнө байгуулжээ. Нөгөө саалиа бэлдэхээр саваа бэлд гэдэг шиг. 20 мянган хувьсагчтай тоо бодож, юмыг урьдчилан харж чаддаг түүний хувьд Оюу Толгойгоос Рио Тинтогийн олон тэрбум ам.долларын алт, зэсний ашгийг нэмэгдүүлж, Монголын ашгийг бууруулах үйл ажиллагаа явуулж, шагналд нь Рио Тинтогоос их хэмжээний шан харамж авч болох юм гэж харсан бололтой. Учир нь, Британи, Австралид төвтэй олон улс дамнасан уул уурхайн компани Рио Тинтогийн шаардлагаар С.Баярцогт 2011 онд татварын хуулинд өөрчлөлт оруулж, олон хөнгөлөлт бий болгосон. Түүнчлэн С.Баярцогт тухайн үед Монголд гаднын уул уурхайн компаниудыг оруулж ирэхийг дэмжигчдийн тэргүүн эгнээнд зогсч байсан хүн хэмээн онцолжээ. С.Баярцогтын хувьд тэрбээр 2008 оны 9 дүгээр сарын Сангийн сайд болж 2010 оны наймдугаар сард Засгийн газар солигдох хүртэл албан тушаалаа хашиж байсан бөгөөд эдгээр жилүүдэд Азийн Хөгжлийн банк болон Европын Сэргээн босголтын банкны захирагчийн албыг давхар хашиж, өөрийн буурай орон /Монгол Улс/-доо гаднын хөгжлийн тусламж, хөрөнгө оруулалтыг авахаар олон улсын уулзалтуудад идэвхтэй оролцдог байжээ.

Ер нь, Монголд үйл ажиллагаа явуулж буй гаднын уул уурхайн компаниуд манай шийдвэр гаргах төвшний улстөрчдийг хахуульдаж, өөрт ашигтай хууль батлуулдаг, мөн Монголд гээд илгээсэн гаднын хандив, тусламж тэр бүр хэрэгтэй зүйлдээ зарцуулагдалгүй улстөрчдийн халаасанд орж ирсэн нь нууц биш зүйл. Ямартай ч, С.Баярцогтын 2008 онд байгуулсан нууц компани болон түүний нууц данс 2013 онд гаднын эрэн сурвалжлах сэтгүүлчдийн тусламжтайгаар илэрсэн юм. Түүнээс биш 5 жил нууцлагдаж, хөрөнгө орлогын мэдүүлэгт огт дурдагдаагүй энэ компани илрэхгүй байв. Олон улсын сэтгүүлчид “С.Баярцогтын хувийн оффшор компанийн үйл ажиллагаатай холбоотой ямар ч ул мөр олон нийтэд анзаарагдаагүй юм.

Тиймээс түүнийг Сангийн сайд байх үед оффшор компани болон Швейцарь данс илрээгүй юм” гэжээ. Энэ нь түүний нууц компанихаа үйл ажиллагааг Хонконгоос удирдан явуулдагтай холбоотой байсантай холбоотой бололтой. Тиймээс л анхнаасаа компаниа Хятадын гэж бүртгүүлжээ. Гэхдээ эндээс “Легенд Плас Лимитед Плас” компанийг Хятадынх гэхээсээ илүүтэй С.Баярцогтыг Хятад хүн тиймээс компани нь Хятадынх гэж харагдаад байх юм. Харин С.Баярцогтын хэлсэнчлэн 1 сая ам.долларын 800 мянган ам.доллар нь түүний нэрийг хэлэхийг хүсээгүй гурван найзынх бол энэ нь нээх их удахгүй илрэх нь гарцаагүй. Магадгүй тэд улстөрчид ч байж болох юм.

Юутай ч, Олон улсын эрэн сурвалжлах сэтгүүлчдийн консорциумаас Панамаас олж авсан маш олон оффшор компаниудын мэдээллүүдийг нягтлаад тун удахгүй дэлхий нийтэд зарлана гэж мэдэгдэж байсны дагуу зарлах өдрөө зарлажээ.

Тэд 5 дугаар сарын 9-ний өдрийн 14:00 цагт зарлах аж. Магадгүй энэ үеэр Монголын хоёр дахь, гурав дахь гэх мэтчилэн оффшортонгуудын нэрс тодорч болох л юм.

Төгс