“Эрдэнэс тавантолгой” Хятад, Солонгосчуудын өмч болоход бэлэн байна

Эрдэнэс тавантолгой компанийн 1072 хувьцааг нэг сая төгрөгөөр худалдаж авна гэх зар өнгөрсөн долоо хоногт гарч иргэд хувьцаагаа худалдахаар шийдсэн байжээ.  Тодруулбал хувьцаагаа зарах гэсэн иргэд урт цагааны урдуур очиж, нэлээд дараалал үүсгэсэн тухай зарим хэвлэлээр гарч байсан. Мөн нэгэн хар машинтай хужаад иргэд хувьцаагаа худалдаж байсан гэх мэдээлэл байгаа юм. Энэ тухай нэгэн иргэн фэйсбүүк хуудаснаа нийтэлсэн байдаг. Гэхдээ уг хувьцаа худалдаж авах тухай асуудал нь залилангийн хэрэг байсан байж болзошгүй байгаа юм байна.

Ямартай ч Чингэлтэй дүүргийн цагдаагийн хэлтэст “Хувьцаа эзэмшигч, хөрөнгө оруулагчдын эрхийг хамгаалах төв” ТББ-ын гүйцэтгэх захирал Э.Алтаншагай, үнэт цаасны “Стандарт Инвестмент” ХХК-ийн гүйцэтгэх захирал Д.Жаргал нарыг шалгаж эхэлжээ. Тэднийг эрүүгийн хуулийн 161 дүгээр зүйлийн 161.2 дахь хэсэгт зааснаар буюу бусдыг залилсан гэмт хэрэгт буруутган эрүүгийн хэрэг үүсгэн, шалгаж байгаа юм байна.

Дээрх хоёр байгууллага өнгөрсөн 2015 оноос эхлэн хамтран ажиллах гэрээ байгуулж, улмаар “Новел Инвестмент” гэх ХХК-ийн салбар төлөөлөгчийн газрыг байгуулсан аж. Санхүүгийн зохицуулах хорооны зөвшөөрөлгүй уг төлөөлөгчийн газарт иргэд 5000 төгрөгөөр данс нээлгэсэн бөгөөд тухайн данс нь баталгаажихгүй байсан учир хуулийн байгууллагад мэдэгджээ. Хувьцаа худалдаж авна гэх зарыг БНСУ, БНХАУ-ын хөрөнгө оруулалттай компаниуд худалдаж авахыг санаархаж, иргэд ч тэдэнд зарахад бэлэн байжээ. Одоогийн байдлаар иргэдийн хувьцаа эдийн засгийн эргэлтэд ороогүй байгаа тул эл асуудал ингээд намжсан байна. Өөрөөр хэлбэл иргэдийн хувьцаагаа зарах эрх нь нээгдвэл 1072 хувьцаа Хятад Солонгос иргэдийн хоол болох янзтай байна гэсэн үг. Өөрөөр хэлбэл Монголын ард түмний өмч хэмээдэг  “Эрдэнэс тавантолгой” компаниа гадныханд өгч байгаатай ялгаагүй зүйл болно.

Тавантолгойн уурхайгаас олсон ашгаа иргэн бүрт хүртээх зорилгоор 1072 ширхэг хувьцааг  Монгол Улсын иргэн бүрийн нэрийн дансанд байршуулчихсан байгаа гэж албаны хүмүүс хэлдэг.  Хувьцаатай эсэхээ шалгахын тулд “Үнэт цаасны төлбөр тооцоо төвлөрсөн хадгаламжийн төв”-ийн цахим хуудаст регистрийн дугаараа бичээд хайхад гарч  ирдэг аж.  Харин нэгж хувьцааны үнэ ханшийг Засгийн газар тогтоох эрхтэй байдаг ажээ. Одоогоор тогтсон үнэ гараагүй байгаа болохоор нэг хүнд хэдий хэрийн хөрөнгө оногдож байгааг хэлэх боломжгүй гэдгийг Санхүүгийн зохицуулах хорооноос хэлдэг байна.

Н.Ганаа