Барууны зах зээл дэх юанийн давшилт

Дотоодын эдийн засаг нь удаашралтай байгаа ч Хятадын АНУ, Европ дахь хөрөнгө оруулалт толгой цохиж байна. 2015 онд БНХАУ-ын төрийн болон хувийн хэвшлийнхнээс Норвеги, Швейцарь болон Европын холбоонд 23, АНУ-д 15 тэрбум ам.долларын хөрөнгө оруулсныг Америкийн Baker & McKenzie хуулийн фирм, Rhodium Group зөвлөх компани тогтоосон байна.

Гэсэн хэдий ч барууны эдийн засагт оруулах Хятадын хөрөнгө оруулалт буурч байгааг шинэ тоо баримтууд илэрхийлэв.

Хятадаас Европын зах зээлд оруулсан хөрөнгө оруулалт 2015 онд өмнөх оныхоос 28 хувиар өссөн аж. Харин 2014 онд орсон 18 тэрбум ам.долларын хөрөнгө нь 2013 оныхоос хоёр дахин өссөн дүн юм. Тэгвэл АНУ-д 2014 онд оруулсан 12.8 тэрбум ам.долларын хөрөнгө оруулалт 2015 онд 17 хувийн өсөлт болж саарсан байна.

Дэлхийн санхүүгийн зах зээлүүдийг савлуулаад буй Хятадын эдийн засгийн нөхцөл байдал евро бүсийн болон томоохон эдийн засгуудын ирээдүйд ч нөлөөлж эхлээд байгаа билээ. Үүнтэй холбоотойгоор Европын төв банк пүрэв гарагт эдийн засгийг сэргээх ээлжит арга хэмжээгээ авахаар бэлтгэж байна.

Харин Хятадын хамгийн баян эрхэм болох Ван Жялин тус улсын төрийн эзэмшлийн оролцоотой компаниуд менежментийн олон улсын шалгуурт нийцэхгүй байгааг шүүмжилжээ. Гэхдээ Baker & McKenzie- гийн дэргэдэх M&A / Mergers and acquisitions/ үйл явцын ажиглагч Майкл Де Франко хөгжингүй зах зээлүүдэд оруулсан Хятадын компаниудын үйлдлийг “Эдийн засгийн хүнд хэцүү цаг үе тохиож байгаа ч Хятадын компаниуд Хойд Америк болон Европын зах зээлд гол нүүдлээ итгэлтэйгээр үргэлжлүүлж байна” хэмээв.

Хэдийгээр 2015 онд Хятадын хөрөнгө оруулалт бага зэрэг саарсан ч энэ онд амжилтаа ахиулах замдаа дахин ороод буй аж. Он гарсаар эхний зургаан долоо хоногийн байдлаар өмнөд хөршийн компаниуд барууны зах зээлд 70 тэрбумын хөрөнгө оруулах гэрээг бэлтгэсэн байна. Гэхдээ энэ нь урьдчилсан байдлаар гарсан тоо бөгөөд бүх гэрээ амжилттай болно гэсэн үг биш.

Евро бүсэд оруулсан Хятадын шууд хөрөнгө оруулалт 2014 онд 12.5 тэрбум ам.доллар байсан бол өнгөрөгч онд 37 хувиар өсөж, 17.1 тэрбумд хүрчээ. Евро бүсдээ сулханд тооцогдох Италийн эдийн засаг Хятадын хөрөнгө оруулалтаас хамгийн ихийг авчээ. Араас нь Франц улс аялал жуулчлал, дэд бүтцийн салбарт томоохон гэрээ байгуулж, 3.6 тэрбум ам.долларын хөрөнгө оруулалтаар удаалсан байна.

Тэгвэл АНУ-д Нью-Йорк, Калифорни, Техас мужид Хятадын хөрөнгө оруулалт голложээ. Нью-Йорк хотод л гэхэд санхүүгийн томоохон үйлчилгээ, үл хөдлөх хөрөнгийн зах зээлд зонхилсон 5.4 тэрбум ам.долларын хөрөнгө оруулалт хийсэн аж.

Клейр Жонс 

Засгийн газрын мэдээ