Дэд сайд Б.Болор шиг “ногооноороо” хүмүүс яаж Б.Хурцыг суллуулах ажлыг хөөцөлдөж чадах вэ дээ
“Үндэсний аюулгүй байдлын Ажлын албаны дарга Б.Хурц суллагджээ” гэсэн мэдээлэл хэвлэлүүдээр долоо хоногийн өмнөөс цацагдаж эхэлсэн. Энэ мэдээлэлд хариу өгчих, өгөх ёстой хүн бол Гадаад харилцааны дэд сайд Б.Болор. Юуны төлөө Б.Хурцыг суллах ажлын хэсгийн ахлагч гэсэн гуншинтай билээ. Сэтгүүлчид энэ мэдээлэл үнэн эсэхийг түүнээс тодруулсан. Тэр үгүйсгэж байна. “Б.Хурц суллагдаагүй. Хүүхдээрээ тангаргалсан ч болж байна”, “Суллагдаагүй гэдгийг нь 100 хувь баталж байна” гэж баахан сүржигнэн телевиз, сонинд тодруулга өгчээ. Маргааш нь Б.Хурц өөрийн биеэр морилоод ирэв. Онгоц буухаас нэг цагийн өмнө ирж буйг нь дуулсан дэд сайд “Чингэс хаан” олон улсын нисэх онгоцны буудалд түргэн аван очжээ. Тэр булайгаа дэлгэлээ. Түүний хэлсэн үгний үсэрсэн шүлс нь хатаагүй шахам байхад Б.Хурц ирчихлээ. Ямар мэдрэмжгүй дэд сайд вэ. Яасан зоригтой худал хэлж чадав аа. Б.Хурцыг суллах Ажлын хэсгийн ахлагч нь шүү дээ, энэ хүн. Ичмээр зүйл тэнд өрнөв. Бантаж тэвдсэн Б.Болор гараад ирлээ. Сэтгүүлчид ч бүчээд авлаа. Дэд сайдын нүүр улайсангүй. Худал хэлсэндээ санаа зовж байгаа юм ч алга. Хээвнэг “Мэдээлэл хийхгүй бол болохгүй нь” хэмээн сэтгүүлчдийн асуултад хариулахаар болов. Ямар ч мэдээлэлгүй явсан дэд сайд мэдээлэл хийх гэж бас л булайгаа чирлээ. “Би Б.Хурцтай хэдхэн хором хөөрөлдлөө. Энэ талаар хэлэх юм алга”, “Мэдээлэлгүй байгаа болохоор хариулж чадахгүй нь”, “Түүнийг Германы тал “Та чөлөөтэй явж болно” гэж хэлээд сулласан” гэх мэтийн хэдэн өгүүлбэр 10 орчим минут давтаж хэлсээр яриагаа дуусгав. Түүнийг мэдэмхийрээд хэвлэлийнхэнд “Би мэдэж байна. Хурц суллагдаагүй” гэж үр хүүхдийнхээ нэрийг барьж тангараг өргөн, ярилцлага өгч байх зуур нь Б.Хурц аль хэдийнэ суллагдсан байжээ. Монголоос эхнэр хүүхэд нь БНСУ-д очиж, түүнийг тосч уулзаад тэнд Б.Хурц эмчлүүлж байсан байна.
Зүй нь бол дэд сайд сэтгүүлчдэд юу ярихаа мэдэх ёстой. Тэр бүү хэл Германы хэвлэлээс мэдээлэл авчихсан, Б.Хурцыг юуны учир суллагдсан тухай ярих ёстой байв. Гэвч тэр өөрийгөө ажилдаа ямар хариуцлагагүй, мэдрэмжгүй ханддаг болохоо харууллаа. Сэтгүүлчдэд худал мэдээлэл тараасныхаа хариуцлагыг тэр хүлээх ёстой.
Хаврын чуулган завсарлахаас өмнө монголчууд Мэдээллийн ил тод байдал ба мэдээлэл авах эрхийн тухай хуультай болсныг энд сануулах хэрэгтэй биз. Энэ хуульд зааснаар бол мэдээлэл авах эрхийг ноцтой зөрчсөн тохиолдолд тухайн хүнийг төрийн албанаас халах хүртэл арга хэмжээ авах тухай хуульчилсан. Энэ хууль мөрдөгдөхгүй цаасан дээр байх ёстой гэж үзээгүй л юм бол хамгийн түрүүн Б.Болортой хариуцлага тооцуулах учиртай.
Төрийн дэд сайд хийх нь битгий хэл төрийн албанд ч тэнцэхгүй ийм хүнийг Б.Хурцыг суллах ажлын хэсгийг ахалж чадна гэж Ерөнхий сайд С.Батболд яаж найдаж чадав. Түүнийг удирдаж буй Гадаад харилцааны сайд Г.Занданшатар ч бөх зүрхтэй хүн юм. Яагаа ч үгүй нов ногоон түүхий залуусаар төрийн өндөр алба хашуулж буй энэ Засгийн газар нусгай жулдрайнуудынхаа армиас салахгүй бол болохгүй нь. Түүхэнд инээдмийн юу ч мэдэхгүй алиа салбадай нараар дүүрэн Засгийн газар хэмээгдэн үлдэх вий дээ. Энд Б.Болор шиг юугаа ч мэдэхгүй, ажил хийж чадахгүй “ногоонтнууд” дүүрэн бий. Тэд өөрсдийгөө магтан мандуулж, цээжээ дэлдэж явахаас Монголын төрийн төлөө юу хийж чадах билээ. Б.Болор тэдний л нэг. Өөрийгөө гурван үеийн дэд сайд хэмээн бардамнан омогшиж явдгийг нь мэдэх юм. Дотоод харилцаа гэдгээ ч мэдэхгүй хүн яаж гадаад харилцаагаа ойлгож мэдрэх вэ дээ. Тэгээд бүр Б.Хурцыг суллах ажлыг Б.Болор хөөцөлдөнө гэдэг лөөлөө. Яаж ч чадах вэ дээ. Ядаж л үүрэгт ажлаа хийж чадаагүй Б.Болороор Б.Хурцыг суллуулахад зарцуулсан мөнгийг төлүүлье, хариуцлага тооцъё. Энэ ажлын хэсэг 100 гаруй сая ам.доллар зарцуулсан гэдэг юм билээ. Б.Хурцын өмгөөллийн үйл ажиллагаа явуулах өмгөөлөгчийн нэг цагийн хөлс 150 ам.доллар гэж яригдаж байсан. Энэ мөнгө хэд болж үржсэнийг хэн мэдэхэв. Юутай ч татвар төлөгчдийн мөнгөөр ажлын хэсгийн ахлагч гэх нөхөр замбараагүй “тоглочихсон” байна.
Аль нэг намын зарим лидерийн хажуу хавирганд зүүгдэж, хэдэн төгрөг хандивлаж энэ сэнтийд “ногооноороо” байгаа залуус хүрдэг нь нууц биш. Гэхдээ хэнийг томилж, ямар хүнд төрийн хариуцлагатай ажил даалгахаа энэ Засгийн газар мэддэг болмоор юм. Өмнө нь ингэж булайгаа чирч байсан дэд сайд байсан эсэхийг бүү мэд. Б.Болор уг нь сэргэлэн, гадаад, дотоод харилцаагаа мэддэг байсан бол Б.Хурцын өмгөөлөгчтэй холбогдож, ядаж л тухайн улс оронд суугаа Элчин сайд, консулаас мэдээлэл аваад сууж болох байв. Юугаа ч мэдэхгүй нисэх онгоцны буудал дээр гүйж очиж, юу гэж мэдээлэл хийхээ мэдэхгүй тоть шиг хэдэн үгээ давтаад сэтгүүлчдийн өмнө бүлтэлзээд зогсож байх юм. Ийм дэд сайд гэж байх уу. Амны салиа нь арилаагүй ийм л залуусаар сайд, дарга хийлгээд байхаар энэ улс орон чинь юу болох вэ. Монголын төр ийм “ногооноороо” залуусаас цэвэрших хэрэгтэй байна. Монголын ард түмэн Б.Болор гэдэг хүнийг мэдэхгүй. Харин тэр Б.Хурцыг суллах ажлын хэсгийн ахлагч болж худал, үнэн нь мэдэгдэхгүй зүйл ярьж нэг хэсэг “од” болсон. Энэ л үеэс хэвлэл мэдээллээр дамжуулан хагас дутуу ч гэсэн танигдаж эхэлсэн байх. Түүнээс Б.Болор гэж хэн юм бэ. Ингэж шившгээ дэлгэж ажил хийж татвар төлөгчдийн мөнгөөр цалинждаг хүмүүсээсээ ангижрах болжээ, Ерөнхий сайд С.Батболд оо.
Г.ЯЛГУУН
udriin sonin
URL:
