Хонхэрэйдийн Б.Энхбатад оноосон 25 жилийн хорих ялыг хэвээр үлдээв

Дээд шүүхийн хяналтын шатны эрүүгийн хэргийн шүүх хуралдаанаар Хонхэрэйдийн Б.Энхбатад холбогдох хэргийг шүүгдэгчийн гаргасан гомдлын дагуу өнөөдөр хянан хэлэлцлээ.

Б.Энхбат нь 2007 оны 8 дугаар сарын 6-ны орой 20 цагийн үед Баянзүрх дүүргийн 12 дугаар хороо Зүүн Жанжины гудамж орчимд иргэн Ч-г ялимгүй зүйлээр шалтаглан буудаж санаатай алсан гэмт хэргийг үйлдсэн байдаг. Нийслэлийн Баянзүрх дүүргийн шүүх 2008 оны 6 дугаар сарын 25-ны өдөр дээрх хэргийг хянан хэлэлцээд Б.Энхбатад цаазаар авах ял оногдуулсан юм.

Харин Нийслэлийн давж заалдах шатны шүүхээс Б.Энхбатад анхан шатны шүүхээс оногдуулсан цаазаар авах ялыг 25 жил хорих болгон өөрчилсөн билээ. Улсын Дээд шүүхийн хяналтын шатны эрүүгийн хэргийн шүүх хуралдаанаар уг хэргийг хянан хэлэлцээд Б.Энхбатад давж заалдах шатны шүүхээс оногдуулсан 25 жилийн хорих ялыг хэвээр үлдээхээр шийдвэрлэв.

О.Сайхан