Монголын тэшүүрчид олимпийн эрхээ өвөртөллөө

Голландын Горнинжин хотноо арваннэгдүгээр сарын 14-15-ны өдрүүдэд Гүйлтийн тэшүүрийн залуучуудын дэлхийн цомын аварга шалгаруулах тэмцээн болж өндөрлөлөө. Энэ тэмцээн нь 2016 оны хоёрдугаар сард Норвегийн Лиллехамер хотноо зохиогдох Залуучуудын өвлийн II олимпийн наадмын эрх олгох тэмцээн гэдгээрээ онцлог бөгөөд тус тэмцээнд дэлхийн 21 орны 16-20 насны шилдэг тэшүүрчид хурд, хүч, авхаалж самбаагаа сорилоо.

Энэ тэмцээнд манай улсаас дасгалжуулагч Д.Энхбаяр, тамирчин олон улсын хэмжээний мастер Б.Сумьяа, Я.Зоригтбаатар нар амжилттай оролцож, манай тамирчид оролцсон бүх зайдаа олимпийн нормативыг биелүүлжээ. Мөн манай тэшүүрчид арваннэгдүгээр сарын 28-29-нд Германы Берлин хотноо зохиогдсон олимпийн эрх олгох дараагийн дэлхийн залуучуудын цомын аварга шалгаруулах тэмцээндээ амжилттай оролцож, эрхээ өвөртөлжээ.

Дашрамд дурьдахад, гадаадын тамирчид тус тэмцээнд оролцохоор мөсөн талбайдаа өнгөрөгч наймдугаар сараас эхлэн бэлтгэл сургуулилтаа хийсэн бол манай тамирчид хөрөнгө мөнгөгүйн улмаас арай ядан 10 хоногийн бэлтгэлийг БНСУ-д хийсэн юм байна.

Тамирчдын үзүүлэлт 
Б.Сумьяа
500 м-т 43.96 сек / 46-с 36-р байр /
1000 м-т 1.29.36 сек / 46-с 38-р байр /
1500 м-т 2.19.26 сек / 48-с 41-р байр /
Я.Зоригтбаатар 
500 м-т 38.94 сек / 63-с 42-р байр /
1000 м-т 1.17.89 сек / 59-с 38-р байр /
1500 м-т 1.59.15 сек / 59-с 35-р байр /