Дэлхийн газрын тосны үзэсгэлэн үргэлжилж байна

Арабын Нэгдсэн Эмират улс дэлхийн зах зээл дээр газрын тосны ханш сул байгаа ч эрчим хүчний төслүүдээ төлөвлөсөн ёсоор эхлүүлэхэд бэлэн байгаагаа мэдэгдсэн байна. Арабын Нэгдсэн Эмират улсын Абу Даби хотод болсон Олон улсын Газрын тосны үзэсгэлэн, бага хурлын үеэр том төслүүдээ урагшлуулах бодолтой байгаагаа ийнхүү илэрхийлжээ. Уржигдар Абу Даби хотноо эхэлсэн Дэлхийн газрын тосны хамгийн том үзэсгэлэнд дэлхийн 120 гаруй орны эрчим хүчний 2000 гаруй компани, аж ахуйн нэгж оролцож байна.

Энэхүү үзэсгэлэн, бага хурлын хүрээнд дэлхийн газрын тосны гол нийлүүлэгчдийн нэг Арабын Нэгдсэн Эмират улс том төслүүдээ зогсоохгүй, харин ч ирэх таван жилд түүхий газрын тосны олборлолтоо өдөрт 3.5 сая баррельд хүргэж нэмэгдүүлнэ гэдгээ мэдэгджээ.

Энэ нь одоогийн олборлолтоо өдөрт 500 мянган баррель газрын тосоор нэмж олборлоно гэсэн үг. Нөгөө талаар энэ нь нийлүүлэлт нь эрэлтээсээ давснаас үүдэн ханш нь улам бүр унаж байгаа түүхий газрын тосны үнийг улам сулруулах эрсдэлтэй юм.

Өнөөдөр дэлхийн зах зээл дээр газрын тосны ханш нэг баррель нь 42 америк доллараар арилжаалагдаж байна.  2014 оны зургаадугаар сард 100 америк долларт хүрч байсан газрын тосны ханш сүүлийн хэдэн жилд хамгийн доод үзүүлэлтийг харуулж байна.

Газрын тосны ханш унасан нь дэлхий нийтийг чулуужсан түлшээс сэргээгдэх эрчим хүч рүү шилжихэд саад учруулах эрсдэлтэй гэж судлаачид харж байна. Мөн газрын тосны ханш ингэж сул байх нь ирээдүйд дэлхий даяар түлш шатахууны хомсдолд хүргэж болзошгүйг Олон улсын эрчим хүчний газраас анхааруулсан байна.

Мөн газрын тосны ханш аажмаар өсөж, 2020 он гэхэд 80 америк долларт хүрнэ гэсэн урьдчилсан таамгийг ч дээрх байгууллагаас гаргажээ. Үүний зэрэгцээ газрны тосны ханш сул байгаагаас Саудын Араб улс төсвийн алдагдлаа олон тэрбум америк долларын зээлээр нөхөхөд хүрч байгаа юм.

Өөрөөр хэлбэл, ДНБ-ийхээ багагүй хувийг газрын тосны салбараасаа бүрдүүлдэг Саудын Араб ханшийн уналтаас үүдэн санхүүгийн дефолтоо зарлаж ч мэдэхээр байгааг аль эртнээс эдийн засагчид сануулсан юм.