Ослын даатгалын тогтолцоог сайжруулах чиглэлээр зөвлөлдөх уулзалтыг бүсчлэн зохион байгуулж байна

Хотжилт, үйлдвэржилт эрчимжихийн хэрээр осол гэмтлийн гаралт нэмэгдэж байна. Манай улсад жилд 100 мянга гаруй хүн осол гэмтэлд өртсөний улмаас хөдөлмөрийн чадвараа ямар нэг байдлаар алдаж, нийгмийн халамжийн бүлэгт харъяалагдаж байгаа нь харамсалтай дүн мэдээ юм. Үүнтэй холбоотой өөр нэг тоо дурьдахад жил бүр бид 27 орчим тэрбум төгрөгийг дээрх шалтгаанаар тогтоогдсон тэтгэвэр тэтгэмжид зарцуулж байна.

Тэгвэл “ниргэсэн хойно нь хашгирах” биш үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх замаар бууруулах, дээрх шалтгаанаар халамж хүртэж гэртээ суугаа иргэдийн хөдөлмөрийн чадварыг нөхөн сэргээх, нийгмийн баялаг бүтээгч болгох гол чиглэл бүхий “Даатгуулагчийн үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх, ажил олгогчийн хөдөлмөрийн аюулгүй байдал, эрүүл ахуйн удирдлагын тогтолцоог сайжруулахад дэмжлэг үзүүлэх нь” сэдэвт зөвлөлдөх уулзалтыг бүсчилэн зохион байгуулж байна.

Нийгмийн даатгалын ерөнхий газар, Мэргэшсэн хөдөлмөрийн аюулгүй байдал, эрүүл ахуйн мэргэжилтнүүдийн холбоотой хамтран зохион байгуулж буй энэхүү зөвлөлдөх уулзалтанд Өмнөговь, Дундговь, Говьсүмбэр, Дорнод, Хэнтий, Сүхбаатар аймгуудын  нийт 131 аж ахуйн нэгж оролцсон байна. Дээрх ажил олгогчид нь ажлын байрны эрсдэл өндөртэй, үйлдвэрлэлийн осол, мэргэжлээс шалтгаалсан өвчний даатгалын шимтгэлийг 3 хувиар төлдөг гэдгээрээ онцлог юм.

2012 оноос Нийгмийн даатгалын ерөнхий газрын дарга Ц.Уртнасан Азийн ослын форумын дэд ерөнхийлөгчөөр сонгогдон ажиллаж байгаа ба энэ хүрээнд өөрийн орныхоо ослын даатгалын тогтолцоог сайжруулах чиглэлд төр, хувийн хэвшил, олон улсын байгууллага болоод иргэний нийгмийн төлөөллийн анхаарлыг хандуулж, харилцан зөвшилцөж, хамтран ажиллаж байна.  Азийн ослын форумаас гадна Солонгос, Германы сайн туршлагыг нэвтрүүлэх чиглэлд ахицтай ажиллаж байна. Тухайлбал  2013 онд Германы ослын даатгалын байгууллагатай хамтран ажиллах санамж бичгийг үзэглэн, энэ дагуу 2015 онд Олон улсын ослын форумыг Улаанбаатар хотноо зохион байгуулсан нь өргөн хүрээг хамарсан юм.

Одоо зохион байгуулж байгаа бүсчилсэн зөвлөгөөн ч ослын даатгалын тогтолцоог сайжруулах чиглэлд зангидаж буй бөгөөд ажил  олгогчид тухайлсан сэдвээр тусгайлан сургалтанд хамрагдаж буйдаа талархал илэрхийлж, мөн өөрсдийн санал бодлоо нэмэрлэж байлаа. Дараагийн зөвлөлдөх уулзалт Орхон аймагт 2015 оны 10 дугаар сарын 29-30-ны өдрүүдэд болох бөгөөд Хөвсгөл, Архангай, Дархан-Уул, Сэлэнгэ, Булган, Орхон аймгуудын нийт 100 ажил олгогчдын төлөөлөл оролцоно.