УИХ дахь АН бүлэг Хууль зүйн байнгын хорооны даргын асуудлыг дахин хэлэлцэнэ

Энэ долоо хоногт Хууль зүйн байнгын хорооны даргын асуудлыг хэлэлцэх үед улиран сонгогдох магадлал өндөр байсан УИХ-ын гишүүн Д.Ганбат унаж, Ш.Түвдэндорж гишүүн олонхын дэмжлэгийг хүлээгээд буй. Гэвч тус намын бүлэг ХЗБХ-ны даргын асуудал маргаантай болсон гэж үзэж УИХ-ын чуулган дээр ажлын 5 хоногийн завсарлага авсан байна. Угтаа, даваа гарагт болсон АН-ын бүлгийн ээлжит хуралд 20 гишүүн оролцсоноос 10 гишүүний санал авч, олонхын дэмжлэг авч чадаагүй ч, бүлгээр дэмжигдсэн гэх УИХ-ын гишүүн Д.Ганбатын гомдлын дагуу УИХ-ын гишүүн Ш.Түвдэндоржийг бүлгийн шийдвэрийн эсрэг санал гаргасан хэмээн хариуцлага тооцож,  бүлгийн дэд даргын албанаас нь чөлөөлсөн байна. УИХ дахь АН-ын бүлгийн зарим гишүүний үзэж буйгаар тодорхой мэдээлэлгүй хариуцлага тооцсон нь яарсан шийдвэр хэмээн үзэж, дараа долоо хоногийн даваа гарагийн бүлгийн хурлаараа нухацтай ярилцаж шийдэхээр болсон байна.

АН-ынхны хувьд Хууль зүйн байнгын хорооны үйл ажиллагааг сайжруулах нь нэр хүндийнх нь асуудал болоод буй. Учир нь, Д.Ганбат гишүүний хувьд Өршөөлийн хуулийг үндсээр нь өөрчилж, авлига, албан тушаалын гэмт хэрэгтнүүдийг өршөөж өөгшүүлэх нь хэмээн МАН-ын гишүүдэд олонтаа зэмлүүлсэн. Мөн Хууль зүйн байнгын хороог удирдаж буй арга барилд нь ч олон гишүүн сэтгэл дундуур байгаагаа илэрхийлж байсан удаатай.

Тиймээс авлига, албан тушаалтны гэмт хэрэгтнүүдийг өршөөхийг эрс эсэргүүцэж буй Монгол Улсын Ерөнхийлөгч Ц.Элбэгдоржийг дэмжин Монголын Ардчилсан холбоо мэдэгдэл гаргасан байхад УИХ дахь МоАХ фракцийн гэх тодотголтой УИХ-ын гишүүд Өршөөлийн хуулийн өөрчлөлтийн эсрэг гар нийлэн тэмцэх биз ээ.