“Амгалан” амаржих газар нээлтээ хийлээ

Баянзүрх дүүрэгт төсвийн хөрөнгөөр 150 ортой амаржих газар өнөөдөр ашиглалтад орлоо. Тус төвийн нээлтэд УИХ-ын дарга З.Энхболд оролцож, үг хэлсэн юм. Тэрээр “Монгол Улс эх, нярайн эрүүл мэндийг сайжруулах, эндэгдлийг тогтвортой бууруулж, төрөлтийг дэмжих бодлого, арга хэмжээг тууштай хэрэгжүүлж байгаа. Үүний үр дүнд төрөлтийн тоо сүүлийн жилүүдэд хурдтай нэмэгдэж байгаа. 2000 онд жилд 40.000 эх төрж байсан бол 2014 онд 81.000 болсон. Төрөлтийн тоо 15 жилийн өмнөхтэй харьцуулахад 2 дахин нэмэгдэж 2015 онд монголчууд бид 3 сая дахь иргэнээ өлгийдөж авсан билээ. Эх нярайн тусламж үйлчилгээний чанар, хүртээмж сайжирч, эхийн эндэгдлийг 1990 онтой харьцуулахад 6 дахин бууруулж чадлаа. Энэ бүхэн эх хүүхдийн эрүүл мэндийн төлөө цаг наргүй ажиллаж байгаа эмч, сувилагч, асрагч та бүхний хичээл зүтгэлийн үр дүн юм” гэлээ.

Мөн тэрээр “Амгалан” амаржих газар нээгдсэнээр Баянзүрх дүүргийн эхчүүд ая тухтай, эсэн мэнд амаржих орчин бүрдэж байгааг онцолсон юм.

Duulian.mn