Дархан аварга Д.Цэрэнтогтох агсанд зориулж хүрэл хөшөө босгоно

Монгол Улсын Хөдөлмөрийн баатар, Гавьяат тамирчин, үндэсний бөхийн Дархан аварга, чөлөөт бөхийн ази тивийн аварга Өвөрхангай аймгийн Нарийнтээл сумын харьяат Дашдоржийн Цэрэнтогтох агсаны гэгээн дурсгалд зориулж нутгийн зон олон нь хөшөө босгохоор болжээ. Тэрбээр улсын их баяр наадамд дөрөв түрүүлж, таван удаа үзүүрлэж, 15 удаа шөвгөрсөн нэгэн цагийг эзэлсэн эгнэшгүй их хүчтэн байлаа.

Хөшөөний эх загвар гарсан бөгөөд тун удахгүй хөшөө босгох ажилдаа орох аж. Тус хөшөөг хүрлээр цутгах бөгөөд үйл ажиллагаанд зориулан хандивын аян эхлүүлж байгаа гэнэ.

Монгол бөхийн түүхэнд өөрийн гэсэн байр сууриа мөнхөлж үлдээсэн цуут аваргынхаа гэгээн дурсгалыг хүндэтгэж хөшөөнд нь сэтгэлийн хувь нэмэр оруулахыг хүссэн хүн бүр дээрх хандивын аянд нэгдэх боломжтой. Хандивыг Улаанбаатар хот дахь Өвөрхангай аймгийн нутгийн зөвлөлийн 5007904887 тоот дансанд өргөх юм байна. Мөн 99118997 гэсэн утсаар холбоо барих боломжтой ажээ.