Ерөнхийлөгч Ц.Элбэгдорж дэлхийн хошой аваргад баяр хүргэв

Чөлөөт бөхийн насанд хүрэгчдийн Дэлхийн аварга шалгаруулах тэмцээн АНУ-ын Лас-Вегас хотноо амжилттай үргэлжилж байна. Өнөөдөр гэхэд эмэгтэйчүүдийн 63кг-ын жинд МУГТ С.Батцэцэг барилдаж дэлхийн хошой аварга боллоо. Тэрбээр алтан медалийн төлөөх шийдвэрлэх барилдаанд залуучуудын дэлхийн хошой аварга, 20 настай Кавайг барилдаан эхлээд 36 секундэд цэвэр дарж хожсон юм.

Ингэснээр С.Батцэцэгийн хувьд ДАШТ-д 2010, 2015 онд алтан медаль, 2013 онд мөнгө, “Лондон-2012″ олимпийн их наадмаас хүрэл медаль хүртэж, Монголын чөлөөт бөхийн түүхэнд нэгэн хосгүй амжилтын эзэн болов.

Тэгвэл түүнд Монгол Улсын Ерөнхийлөгч Ц.Элбэгдорж, өөрийн твиттер хуудсаар дамжуулан баяр хүргэжээ. Тэрбээр, “Дэлхийн хошой аварга Батцэцэгтээ баяр хүргэе. Гайхамшиг бүтээлээ. Дэлхийд дахиад,Олимпод түрүүл. Дэлхийд байхгүйг бүтээ, рекорд хий. Уухай…” хэмээн жиргэжээ.

П.Энхбаатар

Эх сурвалж: fact.mn