УИХ-ын хүндэтгэлийн хуралдаан болно

Монгол улсад байнгын ажиллагаатай парламент байгуулагдсаны 25 жилийн ойг тэмдэглэн өнгөрүүлэх арга хэмжээний хөтөлбөр батлагдлаа. Тус ойг энэ сарын 11-13-ны өдөр тэмдэглэн өнгөрүүлэх бөгөөд эхний өдөр Монгол Улсад байнгын ажиллагаатай парламент байгуулагдсаны 25 жилийн ойд зориулсан эрдэм шинжилгээний бага хурал болох бөгөөд мөн ойг тохиолдуулан гаргаж буй үзэсгэлэн нээлтээ хийнэ.

Харин 12-ны өдөр парламентын гишүүд, ажилтнуудын дунд шатрын тэмцээн зохион байгуулсан бол орой нь хүндэтгэлийн зоог барих аж. 13-ны өдөр УИХ-ын даргын ажлын өрөөнд Улсын бага хурлын гишүүдэд энгэрийн тэмдэг, үнэмлэх гардуулна.

Үүний дараагаар УИХ-ын хүндэтгэлийн хуралдаан зарлан хуралдуулах ба 14 цагаас Монгол бөхийн өргөөнд ойд зориулсан бөхийн барилдаан болсноор ёслол хүндэтгэлийн арга хэмжээ өндөрлөх аж.