Шивээхүрэн боомтын экспорт 38 хувиар нэмэгдэж, 4.76 сая тонн болжээ
Нүүрсний гарцаараа тэргүүлэх болсон Шивээхүрэн боомтоор өнгөрсөн сард 21.7 сая ам.долларын үнэ бүхий 830 мянган тонн нүүрс БНХАУ-ын зах зээлд гарсан байна. Олон жил яригдаж байсан тээврийн асуудлыг шийдвэрлэж, хүнд даацын автозамыг ашиглалтад оруулсан нь боомтын экспорт өсөхөд нөлөөлж байгаа аж.
БНХАУ-ын талаас мэдээлсэн импортын хэмжээг энэ оны эхнээс өссөн дүнгээр харвал Шивээхүрэн боомтын экспортын хэмжээ 1-7 дугаар сард 38 хувиар нэмэгдэж, 4.76 сая тонн болсон байна. Мөн нүүрсний үнийн дүн өнгөрсөн оны мөн үеэс 43.5 хувиар өсч, 123.6 сая ам.долларт хүрчээ. Хэдийгээр Шивээхүрэн боомт нүүрсний экспортын талаас илүү хувийг дангаараа бүрдүүлж байгаа ч үнийн дүнгийн хувьд Таван Толгойн нүүрсийг экспортолдог Гашуунсухайт боомтоос 46 хувиар бага байгаа аж.
Шивээхүрэн боомтоор экспорт хийдэг уурхайнууд БНХАУ-ын хилээс 50 орчим километр зайд байдаг учир тээврийг хүнд даацын автозамаар шийдвэрлэх боломжтойд тооцдог. Харин Таван Толгой ордын хувьд БНХАУ-аас 200 гаруй километрийн зайтай учир төмөр зам тавих шаардлагатай байгаа ажээ.
Тиймээс Гашуунсухайт боомтын тээврийг хүнд даацын автозам дээр гаргаснаар зардал өсч, экспортын хэмжээ буурсан байна. “Монголын төмөр зам” компанийн мэдээлснээр Гашуунсухайт-Тавантолгой чиглэлийн төмөр замын газар шорооны ажлын гүйцэтгэл 87 хувьд хүрээд зогсоод байгаа юм.
URL:
