Эмнэлэг, сургуулиудыг хувьчлахгүй, төрөөс ипотекийн зээлд зориулж 200 тэрбумын баталгаа гаргана

Зуны дэлгэр өдрүүд айлчилж амьсгалахад бэрх халуухан өдрүүд үргэлжилж байна. Өнгөрч буй долоо хоногт улс төр нийгмийн амьдрал зуны халуунаас дутахааргүй уур амьсгалтай болж өнгөрлөө. Парламентын танхимд шинээр өргөн баригдсан болон хэлэлцүүлгийн шатанд яваа хуулийн төслүүд хаврын чуулгантай уралдаж хэлэлцэгдсээр байна

Эмнэлэг, сургуулиудыг хувьчлахгүй боллоо

Энэ долоо хоногийн хамгийн санаа зовоосон асуудлаар Төрийн өмчийн хувьчлалын асуудлыг нэрлэж болохоор байлаа. Тодруулбал, уг хуулийн төслийн 4.2-т заасан Нийгмийн салбарыг хувьчлах, өөрчлөн байгуулах гэсэн заалт нь анхаарал татсан. Учир нь манайд нийгмийн салбарын төрийн өмч гэвэл гуравдугаар шатны хэдэн эмнэлэг болон улсын их дээд сургууль, төрийн коллежууд байдаг. Энэ хуулийн төсөл араасаа маш их хар дагуулсан ч эцсийн мөчид гишүүдийн эсэргүүцэлтэй тулгарч уг заалтыг тэр чигт нь хассан юм.

АН “Зөвшилцлийн гэрээ”-г эргэн харна

Уламжлал ёсоор даваа гараг бүр УИХ дахь намын бүлгүүд хуралдаж хуулийн төслүүд болон цаг үеийн асуудлаа хэлэлцдэг. Тэгвэл энэ долоо хоногийн АН-ын бүлгийн хурлаар “Зөвшилцлийн гэрээ” буюу хамтарч засаг байгуулсан гэрээг эргэн харах талаар нухацтай ярилцжээ. Энэ талаар бүлгийн дарга Б.Гарамгайбаатар хэлэхдээ “АН-ын гишүүд хамтарсан гэрээний үр дүнг хэлэлцэх нь зүйтэй гэж шийдсэн” гэсэн юм.

Гэхдээ хамтарсан гэрээний асуудлыг АН-ын дотоод зөрчилдөөнтэй холбож тайлбарлаж байгаа. Учир нь засгийн ажил явдагаараа явж байгаа. Харин АН-ын олон фракцууд өөрсдөө эрх мэдлийн төлөө тэмцэлдэж Шийдлийн засгийн газрыг хөндөж эхэллээ гэх яриа ч байна. Даширамд дуулгахад Ардчилсан намын Гүйцэтгэх хорооноос хамтарсан гэрээг нэн яаралтай дүгнэх үүргийг их хурал дахь намын бүлгийн гишүүддээ даалгасан.

Намуудын санхүүжилт ил тод болно

Өнгөрсөн лхагва гарагт Ерөнхийлөгч төрийн ордонд сэтгүүлчдэд мэдээлэл хийсэн. Уг мэдээлэл нь түүний санаачилсан хуулийн төслүүдийн талаар юм. Тодруулбал, Тэрээр Намын тухай хууль, Төрийн албан тухай хуулийн шинэчилсэн найруулгыг боловсруулжээ. Төрийн албаны тухай хуулийг нэлээд боловсронгуй бөгөөд шинэ төвшинд хүргэх хууль болсон гэж дүгнэж болохоор байв. Харин улс төрийн намуудын тухай хуулиар санхүүжилт, гишүүнчлэл, сонгуульд оролцох байдал гэх зэрэг олон хэрэгтэй шийдлүүдийг тусгаж өгчээ. Тэрээр мэдээлэл хийх үеэрээ хэлэхдээ “Би зургаан жилийн турш намуудын тухай хуулийг хүлээлээ. Одоо өөрөө гардаж батлуулна. Мэдээж гишүүд намын эрх мэдлийг хязгаарласан уг хуулийг дэмжихгүй. Гэхдээ би батлагдан гартал нь өргөн барьсаар байх болно” гэсэн юм.

Ипотекийн зээлийн урьдчилгаанд зориулж төр 200 тэрбумын баталгаа гаргана

Энэ долоо хоногт Засгийн газрын хуралдаанаар нийгэмд хүлээлт үүсгээд байсан ипотекийн зээлийн урьдчилгаа хувийг бууруулах асуудлыг хэлэлцлээ. Ерөнхий сайд орон сууцны үнийн дүнгийн 20 хүртлэх хувийн баталгаанд хамрагдах зорилтот бүлгийг тодорхойлж, ипотекийн зээлийн баталгаанд хамруулах шалгуур үзүүлэлтийг тогтоох санал боловсруулан энэ оны 7 дугаар сард багтаан Засгийн газрын хуралдаанд танилцуулж, батлуулахыг Хүн амын хөгжил, нийгмийн хамгааллын сайд С.Эрдэнэ, Барилга, хот байгуулалтын сайд Д.Цогтбаатар, Сангийн сайд Ж.Эрдэнэбат нарт даалгасан.

Ипотекийн зээлийн шалгуур үзүүлэлтийг хангасан иргэнд орон сууцны үнийн дүнгийн 20 хүртэл хувийн урьдчилгаа төлбөрт 200 тэрбум төгрөгийн зээлийн баталгааг арилжааны банкуудад гэрээний үндсэн дээр гаргахыг Хөгжлийн банкны Төлөөлөн удирдах зөвлөлд даалгасан.

Ингэснээр иргэд байранд орох боломж нь нэмэгдэж байгаа юм. Өөрөөр хэлбэл 30 хувийг нь төлөөд байранд орох иргэдийн тоо дууссан учир ийнхүү төр бодлогоор уг асуудлыг шийдэж байгаа гэхэд болно. Гэхдээ үүнийг дагасан орон сууцны үнийн өсөлт болон мөнгөний урсгалыг зохицуулах шаардлагатай гэдгийг санах хэрэгтэй.

Монгол Улсын Ерөнхий сайд Ч.Сайханбилэг АНУ-д энэ сарын 23-27-ны хооронд ажлын айлчлал хийж байгаа. Ерөнхий сайд тус улсын Вашингтон хотод ажиллах бөгөөд энэ үеэрээ Майкрософт Корпорацийн Инноваци, бодлогын төвтэй танилцаж, Дэлхийн банкны Гүйцэтгэх захирал, Америкийн Нэгдсэн Улсын Сенатын Зэвсэгт хүчний хорооны дарга, тус улсын Конгресс дахь Монголын бүлгийн дарга нар, Конгрессын гишүүд, Конгрессын Ардчиллын түншлэлийн дарга зэрэг албаны хүмүүстэй уулзана. Мөн Америкийн Нэгдсэн Улсын Дэд ерөнхийлөгч Жо Байдэн, Худалдааны сайд Пэнни Притцкэр нартай уулзалт хийх юм. Ерөнхий сайд Вашингтон хотноо энэ сарын 25-нд болох Монгол Америкийн бизнес форумд оролцож үг хэлнэ.

Тэрээр өчигдөр Олон улсын санхүүгийн корпораци, Хөрөнгө оруулалтыг баталгаажуулах олон талт агентлагийн удирдлагуудтай уулзалт хийгээд байгаа юм. Мөн Ерөнхий сайд Ч.Сайханбилэг АНУ-д айлчлах үеэрээ Нью-Йорк хотын Хөрөнгийн биржид зочилж үйл ажиллагаатай танилцана. Мөн НҮБ-ын Ерөнхий нарийн бичгийн даргын орлогч Я.Елиассонтой уулзана. “Bloomberg News” мэдээллийн агентлагийн төвд зочилж, уулзалт ярилцлага хийнэ.

Г.Бат