М.Ариунбат: Л.Оюун-Эрдэнээс болж би өөрөө хохироод явж байна

НАМЗХ-ны Ерөнхийлөгч Л.Оюун-Эрдэнийг АНУ-д залилан хийсэн, залилуулсан гэх мэдээлэл цацагдаж буй. Уг залилангийн хэргийн жинхэнэ хохирогч гэгдэх, АНУ-д амьдарч буй М.Ариунбаттай цахимаар холбогдож энэ талаар тодрууллаа.

-НАМЗХ-ны Ерөнхийлөгч Л.Оюун-Эрдэнэ АНУ-д залилангийн хэрэгт холбогдсон мэдээлэл бий. Түүнд таны нэр ч холбогдож байна. Таныг Л.Оюун-Эрдэнэ залилсан юм уу, та түүнийг залилсан юм уу?

-Тийм ээ, энэ мэдээллийг би олж үзсэн. Өнөөдөр би ийм асуудалд нэр холбогдсон ч гэсэн уншигчдаа хүндэтгээд өөрийгөө танилцуулах нь зөв байх. Намайг Мижиддоржийн Ариунбат гэдэг. АНУ-д 15 жил бизнес эрхэлж байгаа жирийн нэг залуу. 2011 оны аравдугаар сард Л.Оюун-Эрдэнэ 2012 оны УИХ-ын сонгуулийн өмнөх бэлтгэл ажлаар АНУ-д ирж, Washington DC-д манай компаниар үйлчлүүлсэн юм. Манай компани 2011 oноос хойш “Tysons College”-той хамтран ажиллаж, Dr.Mehdi Banai захирлын ачаар Монголын олон иргэн АНУ-д жуулчлалаар очих, суралцах боломжтой болсон. Dr.Mehdi Banai  захирал манай Монголчуудад элэгтэй хүн. Арав гаруй оюутны хүчингүй болсон визийг сэргээж өгч байсан. Манай хоёр байгууллагын дунд анх Монгол оюутнуудаас үндсэн сургалтад сарын  $500 төлбөр авна гэж тохирсон. Ингээд энэ амлалтаа биелүүлж, төлбөрөө огт нэмэж байгаагүй. Бид АНУ-д айлчилсан Ерөнхийлөгчийн албан ёсны айлчлал, Сүхбаатар, Баянхонгор аймгийн захиргаа, Эрчим хүч, Хөдөлмөрийн яам, Ерөнхийлөгчийн хэвлэл мэдээллийн алба, Улаанбаатар хотын захиргаа болон бусад компани их дээд сургууль зэрэг олон байгууллагын АНУ-д зорчих албан ёсны ажлыг хамтран зохион байгуулж байсан. Гэвч өнөөдөр Л.Оюун-Эрдэнэ гэх залуугаас болж би өөрөө хохироод явж байна.

-Л.Оюун-Эрдэнэ 8200 ам.доллараа танд залилуулсан гээд байгаа. Хэрэг явдал юунаас эхэлсэн юм бэ?

-Л.Оюун-Эрдэнэ 2011 онд АНУ-д ирээд явснаас хойш жилийн дараа буюу 2012 oны 9-р сард АНУ-д МАН-ын гишүүдэд зориулсан сургалт зохион байгуулах хүсэлт тавьсан. Ингээд МАН-ын даргын нэр дээр “Tysons Collegе” компанийн захиралд “Leadership мanagement сeминар” сургалт зохион байгуулах тухай  албан тоот явуулсан. Үүний хөлсөнд MAН-aaс 8200 ам.доллар шилжүүлсэн. Энэ мөнгөөр дээрх сургалт, семинарын бэлтгэл ажлын төлбөр болон НАМЗХ-ын гишүүн Лувсаннамсрайн Оюун-Эрдэнийн Georgetown university-center for Language education and Developmentийн англи хэлний курсийн бүртгэлийн хураамжийг төлсөн. Л.Оюун-Эрдэнэ англи хэлний курст суралцах бүртгэлдээ тэнцэж суралцах эрхээ авсан. Харин хожим АНУ-ын шүүхээр бидний маргаан шийдэгдэх явцад МАН-ын даргын энэ албан бичиг хуурамч болох нь тогтоогдсон. Тэр үеийн намын дарга Ө.Энхтүвшин ч үүнийгээ хүлээн зөвшөөрч АНУ-ын Элчин сайдын яаманд хандсан юм билээ. Үүнээс л асуудал эхэлсэн хэрэг.

-Энэ сургалт, семинар цаг хугацаандаа болсон уу?

-Сургалт, семинараар АНУ-д 30 монголын иргэн хоёр групп болон 2012 оны 12 сарын 3-нд АНУ-д ирэх хөтөлбөртэй байсан. Бүгд “Tysons Collegе”-д ирж “Leadership Management” семинарт оролцоно гэж баримт бүрдүүлж виз авсан Нэг групп нь Нийслэлийн ИТХ дахь  АН-ын төлөөлөгчид. Тэд Las Vegas – Washington DC  хотоор “Ар Монгол” аялал жуулчлалын компаниар газарчлуулж аялсан. Би тэдэнтэй Washington, DC хотод зочид буудалд нь очиж уулзахад энэ семинарт оролцох төлөвлөгөө  байхгүй гэсэн. Харин МАН-ын төлөөлөгчид Miami хотоор аяласан. Бидэнтэй холбогдоогүй, бид холбогдохыг хүссэн ч чадаагүй. Дараа нь 2013 оны нэгдүгээр сард Л.Оюун-Эрдэнэ Washington DC-д англи хэлний курст сурахаар ирсэн. Л.Оюун-Эрдэнэ АНУ-д ирснээсээ нэлээн хойно “Би тэр сургалтанд хамаагүй. МАН-аас шилжүүлсэн 8200 ам.доллар бол миний хувийн мөнгө, надад эргүүлж өг” гэж шаардсан. Тухайн үед “Tysons Collegе-ийн нэр дээр АНУ-ын виз авсан хүмүүс АНУ-аар аялсан ч сургуульд бүртгүүлээгүй, төлбөр тооцоо хийгээгүй. Тэгсэн хэрнээ дээрх зардлыг надаас нэхэн дарамталж, “Tysons College” компанийг надтай хамт шүүхэд татаж нэг сая ам.доллар нэхэмжилсэн. Мөн энэ хооронд тус компанийн нэр, Dr.Мehdi Banai захирлын гарын үсгийг хуурамчаар үйлдэн Улаанбаатар хот дахь АНУ-ын Элчин сайдын яамнаас виз хүсч залилахыг завдсан хүмүүс. Үүний гэрч буюу хохирогч гэвэл МАН-ын томоохон албан тушаалтан байгаа.  Тэрээр энэ хуурамч бичгээр визэнд ороод хар тамга даруулсан. Энэ мэт үл бүтэх юм хийж явдаг хүн гэдгийг ингэж л би олж мэдсэн. Одоо би энэ хэргийн хохирогч болсон төдийгүй миний босгосон амьдрал, ажил хөдөлмөр, бизнес бүгд дууссан. Миний амьдралыг үрэн таран хийчихээд энхийн цагаан тагаа болон жүжиглэж байгаа Л.Оюун-Эрдэнийг би үзэн ядаж байна. Энэ арчаагүй явдлаа зогсоо гэж түүнд хандан хэлье. Эс бөгөөс би илүү ноцтой, АНУ-ын шүүхээр шийдэгдсэн, нотлох баримттай хэргүүдийг чинь дэлгэх болно шүү.

Э.ЭНХ-ЭРДЭНЭ http://www.medee.mn/main.php?eid=64411