Бодлогогүйн золиос
Монголын төр дээлээ эвдэж хормогч оёж өмсөх… гэгч болж байна. Гаргаж буй тушаал, шийдвэрүүд нь ороо бусгаа. Баахан юм хийж байснаа биш байжээ гээд нураах жишээтэй. Үргүй зардал гаргасных нь хариуцлагыг хүлээх эзэн байхгүй. Үүний нэг жишээ Төрийн албан хаагчдын нэгдсэн эмнэлгийг тойрсон асуудал.
Үнэндээ бол эмнэлэг ч бус эмнэлгийн байр, шинээр барьсан долоон давхар хоёр саарал байшинг “Шүүхийн шинэчлэл” нэрээр дээрэмдэх гэсэн оролдлого явсан хэрэг. УИХ-ын гишүүн Х.Тэмүүжин шинэчлэлийн Засгийн газрын Хууль зүйн сайд болонгуутаа салбараа шинэчилнэ, энэ шинэчлэлд барилга байшин ч хамаатай хэмээн үзсэнээр үйл явдал өрнөсөн. Эхлээд Төрийн тусгай албан хаагчдын эмнэлгийг зэвсэгт хүчний цэргийн госпитальтай нэгтгэж, тэгснээ шинэ байранд нь Хууль зүйн яамны нэг цэгийн үйлчилгээг оруулж, прокурор, мөрдөх албаны байр болгохоор ярьж, гараашийг нь хорих байр болгон ашиглана гэсэн. Эцэст нь эрүүл мэндийн салбарын мэдэлд шилжүүлээд байна. Нэг юманд туйлширдаг манайхны гэм биш зан, Х.Тэмүүжингийн Хуульзүйн сайдаар ажиллаж байхдаа эхлүүлсэн “Шүүхийн шинэчлэл” гэх гоё нэртэй дээрмийн дүнд эмнэлгийн байр хэдэнтээ “хувилгаан” дүрийг олж, эцэст нь иргэдэд үйлчлэх эмнэлэг гэдэг статус дээрээ арай гэж эргэж ирсэн нь энэ. Энэ хүртэл ээдрээтэй зам туулж, улсын төсвөөс чамгүй их мөнгө зарлагадлаа.
Төрийн тусгай албан хаагчийн эмнэлгийг өргөтгөж, орчин үеийн тоног төхөөрөмж суурилуулан ашиглалтад оруулахад 2012 онд 10.6 тэрбум төсөвлөн гүйцэтгэл хийж байв. Гэтэл оффисийн байр болгоно гэсэн Х.Тэмүүжингийн санал, Засгийн газрын 222 дугаар тогтоолоор дотоод заслын ажлыг өөрчилснөөс хойш засварын ажил гурван жил үргэлжлэв. Тогтоол, шийдвэр ч гурван удаа өөрчлөгдөв. Эмнэлгийн зориулалтаар барьсан барилгыг эсэн бусын зориулалтаар ашиглахаар засч, ингэхдээ ихэнхдээ эвдэж нураасан байна. Хамгийн харамсалтай нь Монголдоо хамгийн өндөр хүчин чадалтай, 3.2 тэрбум төгрөгийн өртөг бүхий оношлогооны “MRI”, “СТI” аппаратыг зөөх явцад хөргөлтийн төхөөрөмжийг дэлбэлж сүйтгэжээ. Эвдэн бусниулагчдын гарт сүйдсэн эмнэлгийн барилгыг эргээд эмнэлгийн зориулалтаар засч тохижуулахад өнөөдөр 20 тэрбум төгрөг шаардагдаж байна. Ийм хэмжээний мөнгө улсын төсөвт байхгүй, Засгийн газар санхүүжүүлье гэвч хэтэвч нь хоосон. Эцэстээ энэ мөнгө төсвөөс, өөрөөр хэлбэл, татвар төлөгчид буюу та бидний халааснаас гарч таарна.
Ерөнхий сайд Ч.Сайханбилэг нам нэгт Х.Тэмүүжин анддаа юу ч үүрэгдсэнгүй. Хариуцлага гэдэг зүйл Ардчилсан засгийн үед ийнхүү нүд аньж, монголчууд харалган төрийн бодлогогүйн золиосонд байгаагаа үрж дуусах нь ээ.
Эх сурвалж: “Зууны мэдээ” сонин
URL:
