Залуусын саналаар “Залуу хүн” цуврал лекцийн зочдыг тодруулна

Монголын Залуучуудын Холбооноос жил бүр уламжлал болгон “Залуу хүн” цуврал лекцийг зохион байгуулдаг билээ. Монгол орны ирээдүй хойч болж, өнөөгийн нийгмийг түүчээлж яваа залуустаа өөрийгөө хөгжүүлэх, амжилтанд хүрсэн залуусаараа бахархан тэдний амжилт ололтоос суралцах боломжийг олгох зорилгоор энэхүү лекц нь  7 дахь жилдээ зохион байгуулагдах гэж байна. Салбар бүртээ шилдгийн шилдэг боловч олонд төдийлөн танигдаж амжаагүй манлайлагч  залуучууд дүү нартаа өөрийн амжилтын түүхээсээ хуваалцаж, чин сэтгэлийн яриа өрнүүлж, чөлөөт сэдвүүдийн дор ярилцдагаараа “Залуу хүн” цуврал лекц нь онцлог билээ.

Энэхүү лекц нь  түүх, нийгэм, соёл, ёс заншил зэрэг залуучуудын сонирхсон сэдвийн дор явагддаг юм. Өнгөрсөн жилүүдэд зохион байгуулагдсан цуврал лекцэнд “Эзэнт гүрний туульс” номын зохиогч С.Эрдэнэболд, УДЭТ-ын ерөнхий найруулагч Н.Наранбаатар, СТА жүжигчин Б.Навчаа, “Хамтын халуун сэтгэл” ТТБ-ын зохицуулагч З.Сарантуяа, Катя Зол брэндээр олноо танигдсан Г.Золцэцэг зэрэг салбар салбартаа манлайлагч болсон залуус уригдан ирж, сонирхолтой сэдвээр нээлттэй ярилцлага өрнүүлж байсан юм.

Залуусын хүсэн  хүлээдэг сонирхолтой лекцүүдийн нэг болоод  байгаа  “Залуу Хүн” цуврал лекц  2015-03-06-нд эхлэхээр болоод байна. Монголын Залуучуудын Холбоо нь  2015 оныг  “Бүтээе”  уриан дор залуусыг манлайлагч, хошуучлагч баян байлгах уриаг дэвшүүлж байгаа бөгөөд үүнтэйгээ уялдуулан залуусын санал бодлыг сонсож хамтран ажиллах хүсэл сонирхолтой байгаа юм.  Тиймээс  энэ удаад залуусынхаа санал хүсэлтийг харгалзан үзэх үүднээс онлайн санал асуулга явуулж , оролцогчдыг тодруулах аж. Залуус амжилтын тухай хэнтэй ярилцмаар байгаагаа https://www.facebook.com/events/1476346985965903/?fref=ts  гэсэн хаягаар ирүүлэх бөгөөд хамгийн олон санал авсан зочид цувралаар лекц унших юм байна.